Salmos 97 - Biblia Enxet

¡Wesse' egegkok apteme Wesse' Apwányam!

¹ ¡Kalpayhekxa kélwáxok kélyókxoho kélheykha nak keso náxop! ¡Kalpayhekxa kélwáxok kélheykha nak ekyókxoho egkexe étkók! ¡Wesse' egegkok apteme Wesse' Apwányam!

² Wakhayak ma'a yaphope ekyentaxno; appekkenmeyk apkelánekxésso ektaqmalma apheykha énxet'ák ma'a aptémakxa nak wesse' apwányam, tén han ekpéwomo agko';

³ xegamchek táxa eyáléwe m'a apmonye', kalwatnek chá'a m'a apkelenmexma apheykha nak nepyáwa'.

⁴ Kaltátchesek chá'a nélwanmeygkaxa m'a élyenma apagkok nak; ¡kalpexyennók chá'a xapop ekwet'a enxoho!

⁵ Máxa pápa' chá'a katnehek kalpayhekxak nápaqtók Wesse' egegkok ma'a meteymog élwenaqte nak, nápaqtók ma'a apagkok nak ekyókxoho keso náxop.

⁶ Kaxének chá'a néten ma'a aptémakxa ekpéwomo; apyókxoho énxet'ák chá'a elwetak apcheymákpoho.

⁷ Apkelmegqágwákxók ma'a apkelpeykessamo nak chá'a kéleykmássesso, eyaqheykencha'a nak chá'a apkelwáxok ma'a. ¡Kelháxahágkek apmonye' m'a ekyókxoho aqsok ekha nak élmowancha'a!

⁸ Oh Wesse', kelpayhekxeyk agko' apkelwáxok ma'a apheykha nak Sión, tén han ma'a tegma apkelyawe nak Judá, eñama m'a apkeltémókxa nak chá'a etnahagkok;

⁹ hakte xép Wesse', meyke nak ekhémo, apteme néten ma'a ekyókxoho aqsok nak keso náxop, tén han apteme néten agko' neyseksa m'a ekyókxoho aqsok ekha nak élmowancha'a.

¹⁰ Yásekhohok Wesse' egegkok ma'a aptaqnagko nak aqsok ekmaso; emyók han chá'a m'a melyenseyam nak chá'a apkelyetleykha; megyohok chá'a emok ma'a élmasagcha'a nak apkeltémakxa.

¹¹ Kalsássesek chá'a élseyéxma m'a énxet ektaqmalma nak aptémakxa; keñe chá'a ekpayheykekxa egwáxok ma'a énxet'ák meyke nak apkeltémakxa.

¹² ¡Kalpayhekxa kélwáxok eñama Wesse' egegkok, kéxegke éltaqmalma nak kéltémakxa, kólpeykesho m'a apwesey ekpagkanamaxche nak!