Salmos 95 - Biblia Enxet

Agmeneykmássesek Wesse' egegkok yetlo ekpayheykekxa egwáxok

¹ Kólxegma', agmeneykmássesek Wesse' egegkok yetlo ekpayheykekxa egwáxok; agmeneykmássesek ma'a sentaqmelchesso nak negko'o, tén han Segwagkasso teyp.

² Ólmeyekxak aphakxa yetlo negmésso ekxeyenma egwáxok, agmeneykmássesek negmeneykmasso.

³ Hakte Wesse' egegkok apteme Dios apwányam apagko', apteme Wesse' apwányam neyseksa m'a ekyókxoho aqsok ekha nak élmowancha'a.

⁴ Apkeláneykha nahan ma'a kañók agko' nak xapop; apagkok ma'a egkexe élwenaqte agko' nak.

⁵ Apagkok han ma'a wátsam ekwányam, hakte apkelane axta m'a; ¡apkelane apagko' axta m'a xapop!

⁶ Kólxegma', óltekxeyagkok entapnák ólpeykesho'; óltekxeyagkok entapnák nápaqto' Wesse' egegkok, hakte senlane axta negko'o m'a.

⁷ Cham'a Dios egagkok negko'o m'a, keñe negko'o nenteme énxet'ák apagkok; nenteme nahan nepkések néleñama m'a yókxexma apagkok nak. Kóleyxho sakhem aptáhakxa nak apkeláneya:

⁸ “Nágkólyennaqtés aqsa kélwáxok, kéltéma axta m'a Meribá; kéltéma axta kélweykmo m'a Masá, yókxexma meykexa nak énxet,

⁹ sépkeynma axta ko'o m'a kélyapmeyk nano' axta, neyseksa apkelwete aqsok sélane.

¹⁰ Cuarenta apyeyam axta ko'o weykmok séltaqnawéyak xa énxet'ák nak, axta ektemék se'e: ‘Apkelyetnakhágweykmek apagko' se'e énxet'ák nak; ¡melyeheykekxak ma'a séltémókxa axta etnahagkok!’

¹¹ Axta keñamak ko'o sekxeyenma naqso' yetlo seklo peya melántexek ma'a sekmáheyókxa nak allókassesek apkelyampe énxet'ák.”