Salmos 94 - Biblia Enxet

Dios apteme segyekpelchémo appéwomo

¹ Wesse' Dios, apyaqmagkáseykekxoho nak chá'a nentémakxa, henxekmósap.

² Xép apteme segyekpelchémo ekyókxoho keso nélwanmeygkaxa, ¡yempekxa néten elenmexek ma'a apkeleymákpoho nak, etnésses ekpayhawo nak etnéssesek apkellegassáseykegkoho!

³ Wesse', ¿háxko sa' ekwánxa katnégwók néxa élpayheykekxa apkelwáxok ma'a élmasagcha'a nak apkeltémakxa?

⁴ Megkalyexnegwayam apkelpeywa apyókxoho xa apkeláneykegkoho nak aqsok ekmaso; éleymáxkoho apkelwáxok, éleymáxkoho han ma'a apkelpeywa.

⁵ Oh Wesse', apnaqtawáseykegkok énxet'ák apagkok xa; ¡apyentaxnéssessegkek chá'a apheykha m'a ektáha nak chá'a apagkok!

⁶ Apkelnapmeyk chá'a m'a xentampe'e nak, tén han ma'a apkeleñama nak chá'a mók nekha, apkelnapmeyk han chá'a m'a élyéheykha nak.

⁷ Elxének chá'a melweteya m'a Wesse' egegkok, elxének chá'a mey'ásegko m'a Jacob Dios apagkok.

⁸ ¡Énxet'ák élyeyháxma, kólya'asagkoho sa'! ¿Háxko ekwánxa kólya'ásegwók?

⁹ ¿Meñéya sa' ma'a apkelane nak chá'a egheyk'ák? ¿Métyeheya sa' chá'a m'a apkelane nak chá'a egaqta'ák?

¹⁰ ¿Meñássesagkoya sa' ma'a apkelánéseykekxa nak chá'a apkeltémakxa pók aptémakxa énxet'ák? ¿Mey'asagkeheya sa' ma'a apmésso nak chá'a apkelya'ásegwayam énxet?

¹¹ Apya'ásegkok Wesse' egegkok, énxet wánxa ekxéneykha apwáxok ma'a aqsok mékoho.

¹² Oh Wesse', apkeleñémo énxet apkelxekmósso nak chá'a exchep, tén han apmésso nak chá'a nélxekmowásamáxche apagkok,

¹³ yaqwayam sa' megkatneykha apwáxok ekwa'a sa' ekhem ekmaso, neyseksa kélmeytegkesso máxek ma'a élmasagcha'a nak apkeltémakxa.

¹⁴ Mekxáyhek sa' chá'a Wesse' egegkok ma'a énxet'ák apagkok, mekxáyhek sa' chá'a apxakcha'awok ma'a ektáha nak apagkok.

¹⁵ Keytnekxak sa' makham ekpéwomo kéllánekxésso amya'a énxet'ák ma'a sẽlyekpelchémókxa nak, kalkohok sa' nahan apkelwáxok apyókxoho énxet meyke apkeltémakxa.

¹⁶ ¿Yaqsa sa' ko'o hey'áwak hepásegwak sétamakmo enxoho m'a élmasagcha'a nak apkeltémakxa, tén han ma'a apkeláneykegkoho nak aqsok ekmaso?

¹⁷ Axta agkok ko'o hepasmak Wesse' egegkok, kaxwók axta awanmégwók ma'a apkelwanmeyeykegkaxa nak apkeletsapma.

¹⁸ Xama axta ko'o sektáha seyáneya s'e: “Peyk watsapok”, epasmeyk axta m'a segásekhayo nak xép, Wesse'.

¹⁹ Etaqmelchessásekxeyk axta ko'o exchep ewáxok neyseksa ekxámokma élchetámeykha ewáxok, egkéssek axta ekpayheykekxa ewáxok.

²⁰ Mopwanchek xép etnehek apkelxegexma'a énxet'ák segyekpelchémo megkapéwomo nak chá'a apkeltémakxa, ekmaso nak chá'a apkeltamheykha, apyetnakhasso nak chá'a segánamakxa;

²¹ apkeláneykekxa nak chá'a aptamhágkaxa yaqwayam yenmexek ma'a meyke nak aptémakxa, tén han ma'a melánéyak nak aqsok ekmaso, apkeltémo nak chá'a kólnápekxa'.

²² Wesse' egegkok akke apteme sekyexánegweykekxexa'; Dios ahagkok ko'o apteme semasma apyennaqte.

²³ Yának sa' kalnápekxak apkeltémakxa ekmaso Wesse' egegkok ma'a élmasagcha'a nak apkeltémakxa. ¡Dios egagkok sa' emasséssók!