Salmos 90 - Biblia Enxet

LIBRO 4 (Salmos 90—106 ) Dios tén han énxet

¹ Wesse', xép apteme chá'a negyexánegweykekxexa.

² Xép apteme Dios eyeynamo m'a nanók agko' axta, meláneykxa axta makham ma'a egkexe, tén han xapop, tén han keso nélwanmeygkaxa, etnehek sa' eyke chá'a Dios meyke néxa.

³ Yának chá'a etnekxak xapop énxet etnehek appeywa s'e: “Énxet'ák, kóltemekxa xapop.”

⁴ Máxa xama ekhem agko' xép elanok ma'a mil apyeyam, ekyeyk'a enxoho hemaxta. ¡Máxa ekmanyehel'a kaxog hora axta'a!

⁵ Emasséssók chá'a ekmanyehe agko' ma'a énxet'ák, ektémól'a agwetak negwanmagko.

⁶ Máxa m'a pa'at ekteyapmal'a, kalyapwak axto'o, keñe taxnám kalayósek kaletsapok han.

⁷ Naqsók hegmasséssamhok ma'a aplo nak, ¡mehegya'ássesagkek nentáhakxa!

⁸ Yáxña'akxoho keytnekxak nápaqtók xép mólya'assáxma, tén han nentémakxa ekmaso.

⁹ Kamassegwók chá'a negko'o negweynchámeykha, eñama exchep sentaqnagko; yahamok han chá'a kaxog apyeyam negha, ektémól'a xama nentekkesso nennama.

¹⁰ Setenta apyeyam aqsa chá'a kammok negha; keñe m'a apkelyennaqte nak, ochenta apyeyam aqsa chá'a néxa apheykha; kaqhok eyke kaqheykha egwáxok anxek ekwenaqte, wánxa aqsa agwetak ma'a nélya'ásamaxche' exma, tén han nentamheykha ekyentaxno. ¡Yahamok exog apyeyam, ekhawo nak han negko'óxa'!

¹¹ ¿Yaqsa ekya'ásegkoho m'a aplo ekyennaqte nak? ¿Yaqsa ekweteya m'a aplo?

¹² Hegya'assásegwom negko'o ekyaqwátawo negheykha, yaqwayam sa' negko'o antéhek negya'áseykegkoho aqsok.

¹³ Wesse', ¡henlano makham negko'o! ¿Háxko sa' ekwánxa nélhaxanma? ¡Hẽlayósho negko'o henlano' nentáha nak xép apkeláneykha!

¹⁴ Hegyánchessesho negko'o segmésso segásekhayo yókxoho axto'o, ólmeneykmaksek sa' chá'a negko'o yetlo élpayheykekxa egwáxok neyseksók negheykha.

¹⁵ Hegmés negko'o apxámokma apyeyam élpayheykekxa egwáxok, ekhawo apwánxa axta apyeyam néllegeykegkoho ekyentaxnamo egwáxok.

¹⁶ ¡Yána elwetak apkeláneykha m'a aqsok apkelane, keñe apcheymákpoho m'a aptawán'ák neptámen nak!

¹⁷ Keytek sa' chá'a negko'o tekhenxet ma'a Dios Wesse' egegkok segásekhayo. ¡Wesse', hentekkesses chá'a negko'o nentamheykha, ¡Naqso', hentekkesses chá'a nentamheykha!