Salmos 89 - Biblia Enxet

Dios apmésso appeywa David

¹ Wesse', sa' atnehek chá'a ko'o sekmeneykmasso axének apteme segásekhayo; mayétekkessemek sa' chá'a sekxeyenma apteme mehenyenyaweykha.

² Axének sa' chá'a ko'o megkamassegwayam segásekhayo; tén han megkayaqmagkasseyam mók ma'a ektémakxa mehenyenyaweykha, megkayaqmagkasseyam mók ektéma nak ma'a néten.

³ Aphéssamók axta exchep mók apkelpaqhetchásamákpoho David; apkeltennassegkek axta etnéssesek apkeláneykha apkelyéseykha nak se'e:

⁴ “Wának sa' chá'a ko'o etnahagkok apkelwesse'e apyaqmagkasso exchep ma'a aptawán'ák neptámen.”

⁵ Oh Wesse', elpeykeshok chá'a exchep ektémakxa mehegyenyaweykha m'a apyókxoho apkelásenneykha apheykha nak néten, tén han ma'a aqsok sempelakkasso nak chá'a agwetak apkelane.

⁶ Wesse', méko xama enxoho aqsok kéláyókxa negmowána aghéshok xép, méko han xama aqsok enxoho ekhawo exchep ma'a ekhéyak nak néten!

⁷ Yeykpohok chá'a Dios nepyeseksa m'a apkelásenneykha apheykha nak néten, apwányam apagko' nepyeseksa m'a apheykha nak nepyáwa'.

⁸ Wesse', Dios ekha nak apyennaqte, apagkok xép ma'a ekyókxoho nak apmopwána, wakhayak ma'a aptémakxa ekmámnaqsoho nak; ¡méko ekhawo exchep!

⁹ Kalyahakxohok xép ma'a wátsam ekwányam eklo nak, emasseksohok chá'a m'a élyaqyahayam ekyennaqte nak;

¹⁰ apteyáyekmek xép ma'a yegmen askok ekyawe nak, máxa ápak apteméssessók apchaqhama; apkexpánchessegkek apkelenmexma yetlo apmopwána.

¹¹ Apagkok xép ma'a néten, tén han náxop; xép axta apkelane nélwanmégkaxa, tén han ma'a ekyókxoho aqsok ekhéyak nak awáxok.

¹² Xép apkelane nexcheyha tén han nepyeyam; kelmeneykmássek ekmátsa agko' élxéna apwesey m'a egkexe Tabor, tén han Hermón.

¹³ Apmeyhek xép, awanhek apmopwána; emallánhok chá'a.

¹⁴ Appekkenmeyk apkelánekxésso ektaqmalma apheykha énxet'ák ma'a aptémakxa nak wesse' apwányam, tén han ekpéwomo agko'; wetamaxcheyk segásekhayo, tén han mehenyenyaweykha eñama m'a aptémakxa nak chá'a aqsok apkelane.

¹⁵ Oh Wesse', apkeleñémo énxet'ák apkelmopwancha'a nak chá'a elpeykeshok yetlo élpayheykekxa apkelwáxok, tén han apkelxega nak chá'a éltátchessamakxa nak xép élseyéxma apagkok,

¹⁶ élpeykeseykekxoho nak chá'a apkelwáxok yókxoho ekhem ma'a apwesey nak, ekleklamo nak chá'a apkelwáxok ma'a aptémakxa ekpéwomo.

¹⁷ Hakte xép keñamak ma'a apkelyennaqte nak, tén han apkeleymákpoho; ektaqmeleykha apwáxok senlányo keñamak segyánchessáseykegko negko'o nélyennaqte.

¹⁸ ¡Negáhakkásamaxche negko'o m'a Wesse' egegkok! ¡Wesse' apwányam egagkok ma'a Appagkanamap nak Israel!

¹⁹ Apkelpaqhetchessegkek axta exchep apkeláneykha apteme axta melyenyaweykha, cham'a nanók agko' axta, apkelwanmagko axta eyke. Axta aptemék apkelanagkama s'e: “Élyesáha ko'o xama apyennaqte énxet'ák ahagkok, néten agko' kéláyo nahan ektemessásak, ekpasmeyk nahan.

²⁰ ¡Ekwet'ak ko'o séláneykha David! Éxpaqhássessek han apqátek pexmok égmenek ekpagkanamaxche ahagkok, sekteméssesa wesse' apwányam,

²¹ apasmok sa' chá'a. Eynnaqtések sa' eñama m'a sekmowána,

²² mektámegmék sa' chá'a m'a apkelenmexma, mexók sa' han chá'a m'a élmasagcha'a nak apkeltémakxa.

²³ Amasséssók sa' ma'a apkelenmexma nak; ¡alántekkesek sa' nápaqto'! ¡Alnáhakkasek sa' chá'a m'a aptaqnagko nak chá'a!

²⁴ Wásekhohok sa' chá'a ko'o m'a, mayenyawha sa' nahan chá'a, ayánchessesagkohok sa' apmopwána eñama ko'o.

²⁵ Agkések sa' yaqwayam elanha eyeynamo m'a Mediterráneo ekweykekxoho m'a Éufrates.

²⁶ Sa' etnehek heyának se'e: ‘Xép apteme táta; xép apteme Dios ahagkok, sewagkasso nak teyp, tén han setaqmelchesso.’

²⁷ Atnéssesek sa' nahan ko'o apteme hatte átnaha apketkok, apteme néten agko' nepyeseksa m'a kelwesse'e apkelwányam nak keso náxop.

²⁸ Megkamassegwomek sa' chá'a ko'o seyásekhayo, megkayaqmagkassemek sa' mók ma'a ekhémo mók nélpaqhetchásamáxkoho.

²⁹ Eyaqmagkasek sa' chá'a apteme wesse' apwányam ma'a aptawán'ák neptámen, megkatnégwayam néxa.

³⁰ “Apyetnakhássek sa' agkok ma'a nélxekmowásamáxche ahagkok, metnahágko enxoho chá'a m'a ektémakxa nak ekxeyenma, seyánamakxa nak chá'a etnahagkok,

³¹ melánegko enxoho chá'a m'a segánamakxa ahagkok, tén han melyahakxoho enxoho m'a séltémókxa nak chá'a etnahagkok,

³² allegássesagkohok sa' eñama sénmexeykekxa, tén han apkeltémakxa ekmaso, yetlo séltekpogéyak yámet;

³³ malwátéssemek sa' eyke seyásekhayo m'a David, mayenyawha sa' chá'a.

³⁴ Megkatnehek sa' chá'a malane m'a sekhéssamo axta mók sélpaqhetchásamáxkoho, alának sa' chá'a m'a sektémakxa axta chá'a sekpeywa.

³⁵ Éltennassegkek axta ko'o ekmámnaqsoho, ko'o sektáha nak sekpagkanamaxche', malyexanchesha han:

³⁶ etnahagkok sa' chá'a kelwesse'e apkelwányam apyaqmagkasso m'a aptawán'ák neptámen meyke néxa, megkamassegwánxa nak makham ekhem.

³⁷ ¡Etnahagkok sa' chá'a kelwesse'e apkelwányam, aptémól'a pelten memassegwayam! ¡Megkamassegwánxa nak makham néten!”

³⁸ Apyenyókek eyke exchep ma'a wesse' apwányam apkelyéseykha axta, mékoho aptemessásekxa'; ¡aptaqnókek kaxwo'!

³⁹ Melanak ma'a aphéssamo axta mók apkelpaqhetchásamákpoho m'a apkeláneykha; apyenyókassek náxop ma'a apketchesso apqátek élyenma.

⁴⁰ Apkelyagqaxqatchásegkek ekyókxoho m'a nekhaw'ék nak aphaxtegkesso tegma; ¡nápakha'a apketkók aptemessásekxak ma'a tegma apkelyawe apagkok!

⁴¹ Elyeykhágwak chá'a énxet'ák ma'a, elmenyexek chá'a m'a apmakókxa enxoho chá'a elmenyexek; elesmaksek chá'a m'a apheykha nak nepyáwa'.

⁴² Apméssegkek yaqwayam elátsaha m'a apkelenmexma nak, eñama apkelmallane.

⁴³ Meyke ahamtek apteméssessók ma'a sókwenaqte apagkok, mepasmók han ma'a kempakhakma.

⁴⁴ Apmasséssessek ektémakxa apcheymákpoho; apyaqnegkessessek náxop ma'a aptaháno;

⁴⁵ ekmanyehe aptemessásak apwányamo, apméssek apmegqakto ekwányam agko'.

⁴⁶ Oh Wesse', ¿yaqsa sa' ekhem kamassegwók séxánegkesso? ¿Megkamassegwomeya sa' aplo ektémól'a táxa?

⁴⁷ Wesse', kaxén apwáxok ko'o yaqwátawók sekha; yaqwátawók apha m'a énxet ektáha axta exchep apkelane.

⁴⁸ ¡Méko awanchek kaweynchamha chá'a, tén han megkatsepek xama enxoho! ¡Méko awanchek kamallánek ekmowána m'a nétsapma!

⁴⁹ Wesse', ¿háxko ekmahágkaxa m'a nanók segásekhayo axta, apkeltennassama axta ekmámnaqsoho m'a David, eñama apteme mehegyenyaweykha?

⁵⁰ Wesse', kaxén apwáxok sẽltaqnagkama axta negko'o apxámokma énxet, negko'o nentáha nak apkeláneykha; chaqhegkek ko'o ewáxok xa sẽlxéneykha ekmaso nak.

⁵¹ Oh Wesse', ¡cháxa aptémakxa negko'o sẽltaqnagkama m'a apkelenmexma nak xép! ¡cháxa aptémakxa aptaqnagko m'a apkelyéseykha nak xép!

⁵² Tásek sa' chá'a katnehek apxénamap Wesse' egegkok ekyókxoho ekhem. ¡Katnahagkok sa'!