Salmos 85 - Biblia Enxet

¡Dios, hẽlwagkas makham negko'o teyp!

¹ Wesse', tásek xép apteméssessamakxa s'e apchókxa nak; aptaqmelchessásekxeyk makham apheykha m'a Jacob énxet'ák apagkok;

² meyaqmagkáseykekxak apkeltémakxa ekmaso énxet'ák apagkok, tén han ekyókxoho melya'assáxma nak;

³ Apkelwátessamók agko' aplo, tén han apkeltaqnawéyak énxet'ák apagkok.

⁴ Dios, Sẽlwagkasso nak teyp, ¡hẽlwagkas makham negko'o teyp, ná elenxanmagkoho sẽltaqnawéyak!

⁵ ¿Megkamassegwomeya sa' sẽltaqnawéyak negko'o? ¿Megkatnégwomeya sa' néxa aplo?

⁶ ¿Mehẽlmeyásekxeya sa' makham negko'o nélyennaqte, yaqwayam sa' kalpayhekxak negko'o egwáxok, nentáha nak énxet'ák apagkok eñama exchep?

⁷ Oh Wesse', ¡henxekmós negko'o sẽlásekhayo, hẽlwagkas han teyp!

⁸ Weyxhok sa' ko'o peya nak exének Wesse' egegkok; hakte exének sa' egkések meyke ektáhakxa apheykha m'a énxet'ák apagkok, cham'a ektáha nak chá'a melyenseyam apkelyetleykha, melánegkokxo enxoho makham apkeltémakxa élyeyháxma.

⁹ Yahamok chá'a elwagkasek teyp Dios ma'a ektáha nak chá'a apcháyo; keytek sa' chá'a apcheymákpoho s'e negheykegkaxa nak.

¹⁰ Keypetchekxak sa' segásekhayo m'a ektémakxa nak mehegyenyaweykha, kapathétekxak sa' mók ma'a meyke ektáhakxa nak negha, tén han ekpéwomo nentémakxa,

¹¹ katyapok sa' aqsok ekmámnaqsoho keso náxop, keñe sa' ma'a ekpéwomo nentémakxa eñama nak Dios, kanmexentámhok náxop, ekyetnamakxa nak néten.

¹² Wesse' egegkok apagko' sa' nahan hegmések aqsok éltaqmalma, keyxnések sa' aqsok negkeneykekxa m'a xapop.

¹³ Nentémakxa ekpéwomo sa' kaxog apmonye', kalanaksek sa' ámay apagkok.