Salmos 83 - Biblia Enxet

Nélmaxnagko néltémo hempasmok Dios

¹ Oh Dios, ¡ná ewanmeyha aqsa! ¡ná exa aqsa, epaqmésmakha!

² Elano apkelenmexma, aptaqnagko nak chá'a: apyennegkessek exma, apkenmexákxeyk xép.

³ Apkelyexákpók apkelánegkokxo yaqwánxa etnéssesek ma'a énxet'ák apagkok, ¡apkelmasmo nak chá'a exchep!

⁴ Xénchek apkelwáxok elxegmak hegmasséssók negko'o, yaqwayam enxoho kamassegwók nélwetamaxche', yaqwayam enxoho megkaxénwók chá'a kélwáxok apwesey m'a Israel.

⁵ Apheyásawók mók apkelpaqhetchásamákpoho peya yenmexek xép, apyepetchákxeyk pók apkelánegkokxo aptamhágkaxa yaqwánxa etnéssesek se'e énxet'ák nak:

⁶ cham'a énxet'ák Edom, tén han Ismael, tén han ma'a Agar, tén han Moab aptawán'ák neptámen,

⁷ tén han Guebal, Amón, tén han Amalec, tén han filisteos, tén han ma'a apheykha nak Tiro,

⁸ wokmók nahan apkelyepetcheykekxa m'a asirios, apkelxegexma'a apkelyennaqte nak ma'a Lot aptawán'ák neptámen.

⁹ Etnésses sa' ma'a apteméssessamakxa axta Madián, tén han apteméssessamakxa axta Sísara, tén han apteméssessamakxa axta Jabín ma'a yegmen ényé nak Quisón,

¹⁰ kélmassésseykmo axta m'a Endor, ¡kélchexakhama axta aqsa aphopák éltahapma néten xóp!

¹¹ Etnésses énxet'ák apagkok ekha nak kéláyo apteméssessamakxa axta m'a Oreb, tén han ma'a Zeeb; etnésses apyókxoho apkelámha apmonye'e apagkok apteméssessamakxa axta m'a Zébah, tén han ma'a Salmuná,

¹² apmáheyo axta emok ma'a ektaqmelakxa nak pa'at yókxexma apagkok nak Dios.

¹³ Dios ahagkok, elyettelegwasák aptémól'a pegke apwa', ektémól'a yámet áwa' élyamaye, élpexyawáseyak la'a éxchahayam;

¹⁴ cham'a ektémakxal'a táxa kawatnek naxma, élwatnól'a aqsok néten egkexe m'a eyáléweykha nak,

¹⁵ ¡etne emenxenchesek éxchahayam ekyennaqte apagkok xa ektáha nak, elyegwakkas yahak ma'a segyettekhane apagkok!

¹⁶ Wesse', ¡elmegqaksoho apagko' xép ma'a, yaqwayam enxoho elya'ásegwók ektémakxa exchep apmopwána!

¹⁷ Elmegqágwakxohok apagko' sa' meyke néxa; ¡elmegqeyk sa', tén sa' eletsapok!

¹⁸ ¡Elya'asagkohok sa' xép apteme wánxa Wesse' egegkok, tén han apteme wánxa Dios Meyke Ekhémo ekyókxoho keso náxop!