Salmos 80 - Biblia Enxet

¡Dios, henxekmós negko'o apmopyósa henlano'!

¹ Apkeláneykha nak chá'a Israel, apyentameykha nak chá'a José aptémól'a nepkések, apteme nak wesse' apha néten apyetseksa'ák ma'a apkeláneykha ekha nak apxempenák. ¡Hegeyxho negko'o! ¡Kataqmalmakha apwáxok elanok Efraín,

² Benjamín, tén han ma'a Manasés! ¡Henxekmós negko'o apmopwána, hẽlwagkasseta heykxa teyp!

³ Oh Dios, ¡hentemessásekxa makham negko'o m'a ektémakxa axta negheykha nano'! ¡Kataqmalmakha apwáxok henlano', keñe sa' ólwomok teyp!

⁴ Wesse' Dios ekha nak apyennaqte, ¿háxko ekwánxa katnégwók néxa eklókasso apkelmaxneyéyak ma'a énxet'ák apagkok?

⁵ Nento aptemessáseykekxak ma'a egaqta'ák égmen'ák nak; negyá han aptemessáseykekxa'.

⁶ Apkeltémók chá'a exchep hegya'ássók ma'a apheykha nak neyáwa negókxa', ẽlasméssegkek chá'a m'a sẽlenmexma nak.

⁷ Dios, ekha nak apyennaqte, ¡hentemessásekxa makham negko'o m'a ektémakxa axta negheykha nano'! ¡Kataqmalmakha apwáxok henlano', keñe sa' ólwomok teyp!

⁸ Egipto axta keñamak apleklo anmen yámet; apkelántekkessegkek axta m'a melpeykessamo nak chá'a exchep, tén axta apkeneykekxo m'a apheykegkaxa axta.

⁹ Apchaxñássessegkek axta yaqweykenxa etnekxa', tén axta anmen yámet élatchesa kepmenák xapop, sawheykekxók axta apchókxa.

¹⁰ Chapmeyk axta pessesse agkok ma'a egkexe nak, weykmók axta han aktegák élapma m'a yenta'a élwenaqte agko' nak.

¹¹ Kelweykmók axta nahan aktegák ma'a wátsam ekwányam nak, tén han éltekteyapma m'a wátsam Éufrates.

¹² ¿Yaqsa ektéma apyaqnegkessessama nak kélhaxtegkesso apchahayo chá'a apnakxama m'a appéwomo nak chá'a m'a nekha nak?

¹³ Apkelekkexmeyk ma'a pomáp; ¡teykegkek ma'a aqsok nawha'ák!

¹⁴ Dios ekha nak apyennaqte, hegyo'óta makham negko'o; etaqmelchesho apkenmexeykentámho neghágkaxa ekpayho nak ma'a néten, kaxén makham apwáxok se'e anmen yámet nak,

¹⁵ anmen yámet xeyep apagko' axta apkeneykekxa', éltekteyapma ektáha axta exchep apkenegkessso apagko'.

¹⁶ Emasséssem yetlo aplo m'a ektáha nak chá'a apkelyaqténma, tén han ektáha nak chá'a apkelwatno;

¹⁷ eyke epásem ma'a énxet ektáha axta apkelyéseykha, apkeltektekkesso axta exchep énxet, ektáha axta apyennaqtésso,

¹⁸ magyenyewek egagko' sa' negko'o kaxwók xép. ¡Yána sa' ólweynchamha makham, xeyep sa' aqsa chá'a agwónmakha!

¹⁹ Oh Wesse', Dios ekha nak apyennaqte, ¡hentemessásekxa makham negko'o m'a ektémakxa axta negheykha nano'! ¡Kataqmalmakha apwáxok henlano', keñe sa' ólwomok teyp!