Salmos 8 - Biblia Enxet

Dios apcheymákpoho tén han énxet ekha kéláyo

¹ Wesse' apwányam egagkok, ¡sawheykekxók xép apwesey ekyókxoho yókxexma keso náxop! ¡Yeykhágweykmók apcheymákpoho m'a netnók agko' nak, teyp nak ma'a néten!

² Sakcha'a keyetsék élmeneykmasso ekteykegkoho nak makham neme, keñamak apkeláneya exchep tegma apyennaqte, eñama m'a apkelenmexma nak, yaqwayam enxoho emasséssók ma'a apkenmexeykekxa nak chá'a exchep, tén han ma'a apkelenmexma nak.

³ Élanawók agkok chá'a m'a néten, ektáha axta exchep apkelane, tén han pelten tén han ma'a yaw'a apnegkenma axta m'a,

⁴ katnehek chá'a élchetamso ewáxok se'e: ¿Yaqsa m'a énxet? ¿Yaqsa m'a nentáha nak énxet? ¿Yaqsa ektéma ekxéneykencha'a nak chá'a apwáxok ma'a, tén han ekyetnakhassamo nak chá'a apwáxok?

⁵ Apkeláneyak xép, xegkessamók exnéshok ma'a apkeláneykha ekha nak élmowancha'a, apméssegkek apcheymákpoho, tén han ekha kéláyo,

⁶ apméssegkek xép yaqwayam etnehek wesse' agkok ekyókxoho apkelane axta exchep, apteméssessegkek apteme néten ma'a ekyókxoho aqsok nak:

⁷ cham'a nepkések, weyke, tén han aqsok nawha'ák,

⁸ tén han ma'a náta élchampeykha nak néten, tén han kelasma élleykha nak wátsam ekwányam, ¡tén han ma'a ekyókxoho aqsok ekhéyak nak wátsam ekwányam!

⁹ Wesse' apwányam egagkok, ¡sawheykekxók xép apwesey ekyókxoho yókxexma keso náxop!