Salmos 76 - Biblia Enxet

Dios apmallanmo nak chá'a

¹ Kélya'ásegkok Dios ma'a Judá; kéláyo han apwesey m'a Israel.

² Apyetnegkek tegma appagkanamap apagkok ma'a Jerusalén; aphegkek ma'a egkexe Sión,

³ axta apkelekkexmak kélmeykha nak chá'a kélanchesso kempakhakma m'a: cham'a kéláhakkassamaxche', sókwenaqte, yágke, tén han ma'a sawhéwa.

⁴ ¡Oh Dios, apcheymákpoho exchep! ¡Apwányam apagko' xép, apyeykhásseykmók ma'a meteymog élwenaqte nano' nak!

⁵ Kélyementameykegkek aqsok apagkok ma'a énxet'ák apkelyennaqte apagko' nak; méko apkeláneykegko m'a apkelyennaqte apagko' nak; ¡apkeletsepme'!

⁶ Xama axta apkelpaqhetchesa exchep ma'a yátnáxeg, tén han ma'a apkelyenyawasso nak, xép aptáha nak Jacob Dios apagkok, máxa életsapma axta tamhágkok.

⁷ ¡Yeykpohok xép! ¿Yaqsa katnemekxak xép apmonye' aplawa enxoho?

⁸ Exének axta chá'a exchep yaqwánxa kólteméssesek énxet ma'a aphakxa nak néten; tén axta yeykpok chá'a keso náxop, kalwanmeyekxohok axta chá'a exma,

⁹ cham'a apkempákxo enxoho chá'a néten, xép, oh Dios, yaqwayam elánekxések apheykha énxet'ák, tén han elwagkasek teyp apyókxoho m'a kélnaqtawáseykegkoho nak keso nélwanmeygkaxa'.

¹⁰ Yának chá'a exchep elpeykeshok ma'a énxet'ák apkello nak; ¡elsawásseshok chá'a exchep ma'a metekyawa nak kempakhakma!

¹¹ Kóltennés kóllanaksek aqsok ma'a Wesse' Dios kélagkok, kóllána sa'. Kéxegke kélheykha nak neyáwa apchókxa', ¡kólsantagkas aqsok kélmésso naqsa m'a ekpayhawo nak kóláwho'!

¹² Hakte emasséssamhok chá'a kelwesse'e apkeláneykha nak chá'a apkelókxa', elyegwakkashok han ma'a kelwesse'e apkelwányam nak keso náxop.