Salmos 74 - Biblia Enxet

Nélmaxnagko Dios néltémo kaxének apwáxok énxet'ák apagkok

¹ Oh Dios, ¿yaqsa ektéma segkexakhama apagko' nak? ¿Yaqsa ektéma apkeltaqnaweykegko nak xép ma'a nepkések apkelleykha nak yókxexma apagkok?

² Kaxénwakxoho apwáxok énxet'ák apagkok, apkelmoma axta m'a sekxók eyeynókxa axta, apkelwagkassama axta teyp yaqwayam etnehek énxet'ák apagkok; kaxénwakxoho apwáxok ma'a egkexe Sión, aphamakxa axta.

³ Etyánegwatámho s'e tegma appalleyam apxámokma apagko' nak; ¡apmassésseykmek ekyókxoho aqsok tegma appagkanamap ma'a nélenmexma nak!

⁴ Apkelátseyha eñama apkelmallane apkelenmexma m'a tegma appagkanamap apagkok nak; ¡apkenegkessekmek bandera apagkok apkeñama nak mók nekha m'a,

⁵ néten nak nentaxnamakxa! Máxa yántápak apkelyaqtónmal'a neyseksa naxma ekyentaxno

⁶ aptamhágkok apkelyaqtennágko m'a aqsok élánamáxche nak yántéseksa'ák, póte chá'a apkelyaqtennak, tén han apkeltekpaga chá'a sawo ekyentaxno.

⁷ Apwatneyk ma'a tegma appagkanamap apagkok; ¡apkenyetséssek ma'a kélpeykessamókxa nak chá'a, apyaqnegkessek náxop!

⁸ Xénchek apkelwáxok hegmasséssók negyókxoho; ¡apkelwatneyk ma'a ekyókxoho negaqneykekxexa nak chá'a ólpeykesho'!

⁹ Massék kaxwók nélwet'a m'a aqsok élpagkanamaxche' nélmeykegkaxa nak chá'a ólpeykesho'; méko kaxwók xama enxoho m'a aplegasso nak appeywa, magya'ásegkok han yaqwánxa katnégwók néxa xa.

¹⁰ Oh Dios, ¿háxko sa' ekwánxa katnégwók néxa sẽlenmexeykha m'a sẽlenmexma nak? ¿Háxko sa' ekwánxa katnégwók néxa apxéneykha ekmaso exchep?

¹¹ ¿Yaqsa ektáha memako nak hempasmok? ¿Yaqsa ektáha peya henlanha aqsa?

¹² Nanók agko' xép apteme wesse' apwányam egagkok. Xámokmeyk agko' axta exchep sẽlwagkasso teyp keso náxop:

¹³ apmopwána axta exchep apmeykeseykekxak neyseksa wátsam ekwányam, apkelpáxqatchessegkek axta apqatkok yegmen askok élyawe ekhéyak nak wátsam ekwányam,

¹⁴ apkelpáxqatchessegkek axta apqatkok ma'a yegmen askok ekyawe Leviatán, apcheykegkek axta ápak ma'a aqsok nawha'ák éllo élleykha nak yókxexma meykexa énxet.

¹⁵ Aptekkessegkek axta exchep ma'a élánteyapmakxa nak yegmen, tén han wátsam, apyamassegkek axta m'a yegmen wátsam megkeymáyeykxa nak.

¹⁶ Xép apagkok ma'a ekhem, tén han axta'a; xép axta appekkenma pelten, tén han ekhem;

¹⁷ xép axta apkelqahasso néxa xapop keso nélwanmeygkaxa'; xép axta apkelane ekmexanmakxa exma, tén han apmopsamágekxa'.

¹⁸ Wesse', kaxénwakxoho apwáxok aplókassama exchep ma'a apkelenmexma nak, tén han apxéneykencha'a chá'a ekmaso m'a énxet'ák élyeyháxma nak.

¹⁹ ¡Ná hẽlwánaqma agko' aqsa negko'o! Nélyelqáxkok negko'o, máxa sapop; ¡nágyána aqsa hentók aqsok nawha'ák éllo!

²⁰ ¡Kaxénwakxoho apwáxok ekhémo mók nélpaqhetchásamáxkoho apagkok nak, hakte sawheykekxók negyennaqteyáseykha egyempehek se'e negókxa nak, ekweykekxoho m'a ekyókxoho yókxexma!

²¹ Nágyoho kóltemessásekxak mékoho m'a kélnaqtawáseykegkoho nak; ¡yána elpeykeshok ma'a meyke nak aqsok apagkok, tén han ma'a apkelmopyóseka nak!

²² ¡Oh Dios, yempekxa néten! ¡Emyow ma'a aptémakxa nak! ¡Kaxén apwáxok apkenmexeykencha'a meyke néxa m'a élyeyháxma nak!

²³ Nágkalwánaqma apkelpáxameykha ekyennaqte nak ma'a apkelenmexma, tén han ma'a melwátésseyam nak apyennegkessóxma m'a apkenmexeykekxa nak chá'a exchep.