Salmos 73 - Biblia Enxet

LIBRO 3 (Salmos 73—89 ) Dios ektaqmeleykha apwáxok

¹ ¡Taqmeleykha nak la'a chá'a apwáxok Dios apkelányo m'a Israel, tén han ma'a éláxñeyo nak chá'a apkelwáxok!

² Keñe ko'o, ketók sekpelápeykemxa'; ketók éltáxñeykxa emagkok.

³ Hakte nathayak ewáxok sélányo ektémakxa ektaqmalma apheykha m'a apkeleykmákpoho nak, tén han ma'a élmasagcha'a nak apkeltémakxa.

⁴ Megkáyok apnegya'ák eletsapok, hakte kalyeyha'ak apyempe'ék,

⁵ mellegeykegkoho', ektéma nak ma'a pók énxet'ák nak, melweték nahan ekmaso apheykha, ektéma nak ma'a nápakha nak.

⁶ Cháxa keñamak apkelmeykencha'a nak yáxña'akxoho m'a apkeleymákpoho, ektémól'a negnatanma agkexnek ma'a egyespok, tén han aptéma yáxña'akxoho apkelyennaqteyáseykha apyempe'ék, ektémól'a nentaxno;

⁷ apnaqmelayak apagko', máheyók kalnextog apaqta'ák, xámok agko' élxéneykha apkelwáxok elanagkok aqsok ekmaso.

⁸ Emáwhok chá'a elanagkok aqsok ekmaso yetlo apkelya'ásseyam, tén han éleymáxkoho apkelwáxok, tén han yetlo melmegqakto, exének chá'a elyennaqtésha apyempe'ék;

⁹ exénmakha chá'a ekmaso Dios apha nak néten, kaleyxkohok aqsa chá'a apkelpeywa elweynchamha keso náxop.

¹⁰ Cháxa keñamak éltaqmeleykencha'a nak chá'a apkelpeywa elxénmakha m'a énxet'ák, métyehek chá'a aqsok megyaqhémo apkeláneyak.

¹¹ Etnehek chá'a elpaqmétek se'e: “¿Ey'asagkohoya sa' Dios xa? ¿Ékpelkohoya sa' ma'a Dios meyke nak Ekhémo?”

¹² ¡Kóllano apkeltémakxa m'a élmasagcha'a nak apkeltémakxa! Megkaltemeykha apkelwáxok, exámasagkok aqsa aqsok apagkok.

¹³ ¡Chaqhémok sektéma ektaqmalma sektémakxa, chaqhémok sélwátéssama sélane m'a aqsok ekmaso!

¹⁴ Hakte yókxoho ekhem ko'o setekpageykha, yókxoho axto'ók chá'a ko'o séllegassáseykegkoho.

¹⁵ Temék axta agkok ko'o élchetamso ewáxok ma'a ektémakxa nak élchetamso apkelwáxok ma'a énxet'ák nak, akxakhagwók axta aqsa énxet'ák apagkok.

¹⁶ Élenxáneykmek axta ko'o ay'asagkoho', askehek axta eyke sekmáheyo ay'ásegwók.

¹⁷ Wánxa axta aqsa sekya'ásegwokmo yaqwánxa katnehek apheykha sektaxna m'a Dios tegma appagkanamap apagkok:

¹⁸ apkelya'ássek axta m'a kañe' éláxñékxa nak, apkelyegkek axta m'a yaqwánxa nak emassegwók.

¹⁹ ¡Ekmanyehe sa' kólmasséssók! ¡Apkelaye sa' kasáwa'!

²⁰ Wesse', apkempákxeyk sa' agko' xép néten, aptáha enxoho m'a aptémól'a xama énxet exatakhak kawanmaksek, yának sa' elmassegwók, tén han elwagqamakpok.

²¹ Lamchek agko' axta ko'o ewáxok, legeykegkók axta han,

²² seyeyháxma axta ko'o, may'áseyak aqsok; ¡ekhémók axta ko'o aqsok nawhak nápaqto' xép!

²³ Ekhegkek axta eyke aqsa chá'a ko'o xamo' xép, apmeykegkek axta émek apkelya'assamakxa,

²⁴ epékessáseykegkek axta eyke chá'a sepaqhetchessama, hemok sa' eyke takha', yetlo ektaqmalma sélteméssesakxa'.

²⁵ ¿Yaqsa ekyetnama ko'o m'a néten? ¡Wánxa exchep! Ekheyk sa' agkok xamók xép, méko sa' wámenyéhok aqsok keso náxop.

²⁶ Yelqamáxcheyk ko'o sekyókxa, tén han ewáxok, Dios akke sénnaqtésso, tén han apteme chá'a ahagkok meyke néxa.

²⁷ Eletsapok sa' chá'a m'a apyamasma nak chá'a exchep; emasséssók sa' ma'a apyenseyam nak chá'a apkelyetleykha.

²⁸ Eypetchegwakxak sa' eyke ko'o m'a Dios, hakte cháxa ektaqmela ko'o atnehek xa. Dios Wesse' ahagkok, xép apteme sekyexánegweykekxexa', axének sa' han chá'a ekyókxoho aqsok apkelane nak.