Salmos 72 - Biblia Enxet

Wesse' apwányam kélmaxnéssesso

¹ O Dios, egkés wesse' apwányam aptémakxa ekpéwomo nak xép, tén han ektémakxa nak xép ektaqmalma aptémakxa,

² yaqwayam enxoho elanha yetlo ektaqmalma aptémakxa m'a énxet'ák apagkok, tén han elánekxések ektémakxa apheykha m'a énxet'ák apagkok, meyke nak aqsok apagkok.

³ Kagkések sa' meyke ektáhakxa apheykha énxet'ák ma'a egkexe élwenaqte nak, keñe ekpéwomo apkeltémakxa m'a xóp élekhahéyak nak.

⁴ ¡Elánekxések sa' chá'a apheykha wesse' apwányam ma'a meyke nak aqsok apagkok! ¡Epasmok sa' chá'a m'a apketchek nak énxet'ák ekhakxa nak chá'a eyeyméxchexa aqsok, kóneg sa' etnessásekxak ma'a apnaqtawáseykegkoho nak chá'a!

⁵ ¡Etnehek sa' wesse' apwányam apcháyo nak chá'a exchep megkatnégwayam néxa, ekhakxa nak makham ekhem, tén han pelten!

⁶ ¡Máxa ekmámeye sa' etnehek, tén han yálye, ekyássessamól'a xapop, tén han pa'at!

⁷ ¡Kayákxak sa' meyke ektáhakxa negha, tén han ektaqmalma nentémakxa neyseksa apteme wesse' apwányam, ekwokmoho apmassa m'a pelten!

⁸ ¡Kawomhok sa' apkeláneykha m'a halep wátsam ekwányam ekweykekxoho m'a teyp nak wátsam ekwányam, eyeynamo m'a wátsam Éufrates, ekweykmoho m'a ektemegwánxa nak néxa xapop, keso nélwanmeygkaxa'!

⁹ ¡Elmésakpok sa' ma'a apheykencha'a nak yókxexma meykexa énxet, elháxahagkok sa' apmonye' m'a apkelenmexma nak!

¹⁰ ¡Elsókásegmak sa' apkelmésso naqsa aqsok, tén han apcháncheseykekxa m'a kelwesse'e nak Tarsis, tén han ma'a egkexe étkók nak, tén han ma'a kelwesse'e apkelwányam nak Sabá, tén han ma'a Sebá!

¹¹ ¡Apyókxoho kelwesse'e apkelwányam sa' eltekxeyagkok aptapnák apmonye'! ¡Apyókxoho pók aptémakxa énxet'ák sa' elyahakxoho'!

¹² Hakte elwagkasek sa' chá'a teyp meyke nak aqsok apagkok, apkelwóneykha nak chá'a, tén han ma'a ekhakxa nak chá'a eyeyméxchexa aqsok, meyke nak chá'a ekpasmo.

¹³ Apyósekak sa' chá'a elanok ma'a apkelyelqamákpoho nak, elwagkasek sa' teyp ma'a meyke nak aqsok apagkok.

¹⁴ Megyohók sa' kólnaqtawasagkoho', tén han kólyennaqtésha kélyempehek kóllána', hakte emyók sa' chá'a kólyegkenchesek ma'a éma apagkok.

¹⁵ ¡Memassegwomek sa' chá'a wesse' apwányam! ¡Kólmések sa' sawo ekyátekto ekmomnáwa éleñama nak Sabá! ¡Kólmaxnéssesek sa' chá'a Dios ma'a! ¡Megkamassegwomek sa' chá'a appasmo Dios!

¹⁶ ¡Apxámok sa' etnehek hótáhap apaktek negókxa, etepagkok sa' ma'a naw'ék egkexe nak! ¡Katyapok sa' chá'a aqsok aktek kélcheneykekxa, ektéma nak Líbano, apxámok sa' etnehek énxet tegma apkelyawe nak, ektémól'a pa'at ma'a yókxexma!

¹⁷ ¡Megkamassegwomek sa' chá'a apwesey m'a wesse' apwányam; megkamassegwomek sa' ekxénamaxche apwesey ekhakxa nak makham ekhem! ¡Elxawagkok sa' chá'a ektaqmalma apheykha apyókxoho énxet'ák apheykha nak keso nélwanmeygkaxa, eñama xa wesse' apwányam nak! ¡Apyókxoho pók aptémakxa énxet'ák sa' chá'a eltéhek: “Apkeleñémo”.

¹⁸ Apcheymákpoho sa' chá'a kólteméssesek Dios, apteme nak Dios Wesse' apagkok ma'a Israel, apteme nak wánxa apkelane aqsok élyawe;

¹⁹ kataqmalmakha sa' chá'a kélpeywa kólxének ma'a apwesey eyeymáxkoho nak. ¡Kasawhekxohok sa' chá'a apcheymákpoho keso náxop! ¡Katnahagkok sa'!

²⁰ Cháxa néxa David apkelmaxnagko xa, Jesé apketche nak.