Salmos 71 - Biblia Enxet

Énxet apwányamók apkelmaxnagko

¹ Wesse', ekya'awekteyk ko'o exchep séltamho hetaqmelchesek; ¡nágyoho ko'o amegqeyk xama enxoho!

² ¡Hemallahanches, hewagkas teyp, hakte péwók xép aptémakxa! Heyeyxho ko'o, hewagkas teyp.

³ Etne exchep semasma apyennaqte, ¡etne exchep tegma apyennaqte sekyexanmomakxa, tén han sewagkasso teyp! ¡Xép apteme semasma apyennaqte, tén han tegma apyennaqte ahagkok!

⁴ Dios ahagkok, hewagkas ko'o teyp neyseksa apmáheyo hemok ma'a élmasagcha'a nak apkeltémakxa, tén han apkelyennaqteyáseykha nak chá'a apyempe'ék.

⁵ Hakte axta ay'ásseykmok chá'a ko'o exchep Wesse', seyeynamo m'a sektémakxa axta étkok, seyásenneykekxa axta chá'a ektemék.

⁶ Nanók axta ko'o seyásenneykekxa exchep sekyetnamakxa axta kañe' méme awáxok. ¡Xép axta setekkesso! ¡Alteméssesek sa' chá'a ko'o exchep apcheymákpoho!

⁷ Apxámok axta énxet'ák élyamassama apkelwáxok apkelweteya setnamakxa', xép eyke apteme sekyexánegweykekxexa'.

⁸ Yókxoho ekhem chá'a ko'o sekmeneykmasso axének ma'a apcheymákpoho;

⁹ ná etne aqsa mehelányo sektáha enxoho sekwányamo; ná heyenyaw aqsa, ekmassa enxoho ekha sekyennaqte.

¹⁰ Apyepetchákxeyk pók ma'a sélenmexma apmáheyo nak chá'a heyaqhek, apkelánekxeyk apkelpaqmeyesma apkelxéna yaqwánxa hetnéssesek.

¹¹ Aptáhak chá'a s'e: “¡Kólemhák, kólma sa', hakte apyenyókek ma'a Dios, méko kawagkasek teyp!”

¹² Dios ahagkok, ná heyenyaw aqsa ko'o, ¡hey'óta heykxe hepásegwata'!

¹³ ¡Elmegqágwakxohok sa' ma'a sélenmexma sénmexeykha nak chá'a, kólmasséssók sa'! ¡Elasmésakpok sa' ma'a apmáheyo nak chá'a hetwássesha sekha!

¹⁴ Malwátéssemek sa' eyke ko'o sélhaxanma exchep, ayánchessamhok sa' aqsa sélpeykessamo;

¹⁵ yókxoho ekhem sa' chá'a ko'o axének sẽlwagkassama teyp xép, tén han senláneseykekxa negheykha. ¡May'ásegkok eykhe ko'o xa aqsok nak!

¹⁶ Wesse', axének sa' ko'o ektémakxa nak ekyawe aqsok apkelane; ¡axének sa' chá'a ko'o exchep wánxa apteme appéwomo!

¹⁷ Dios ahagkok, xép axta sélxekmósso eyeynamo m'a sektémakxa axta étkok, makhemek eyke makham ko'o sekxeyenma m'a aqsok élyawe apkelane nak.

¹⁸ Dios ahagkok, ná heyenyaw aqsa, sektáha nak sekwányamo, tén han ekmopa nak épátek, seyewagko nak makham altennaksek ektémakxa apmopwána ekyawe s'e kaxwe apkektega nak, tén han ma'a yaqwayam nak elántépok egmonye'.

¹⁹ Oh Dios, weykmok xép aptémakxa ekpéwomo m'a néten, élyawa agko' xép aqsok apkelane; ¡méko aghéshok xép!

²⁰ Xámok eykhe exchep segkésso aqsok ekmaso, tén han ekyentaxno sekha, hélenxánegkeshok sa' eyke makham sekha; megyohók sa' amhagkok ma'a apkelmaheykegkaxa nak apkeletsapma,

²¹ heyánchessásekxak sa' nahan ko'o kélteme séláyo, hepeykessásekxak sa' makham ewáxok.

²² Anneykmaksek sa' eyke ko'o negmeneykmasso, alpeykeshok ektémakxa nak mehenyenyaweykha, yetlo sekpáwasso arpa, alpeykeshok sa' Dios ahagkok, Appagkanamap nak Israel, yetlo sekpáwasso yát'axpog.

²³ Kapayhekxak sa' ko'o ewáxok sekmeneykmássesa enxoho, ekweykmoho kañók agko' ewáxok, hakte ewagkassegkek teyp.

²⁴ Yókxoho ekhem sa' chá'a axének xép apteme appéwomo, hakte apkelmegqágweykxeyk ma'a apkeltémo axta hetnéssessamhok exma ekmaso, mékoho aptamhákxa'.