Salmos 7 - Biblia Enxet

Wesse' egegkok apteme segyekpelchémo ekpéwomo aptémakxa

^1-2 Dios Wesse' ahagkok, ekya'awekteyk ko'o exchep séltamho hetaqmelchesek; ¡hewagkas ko'o teyp nepyeseksa m'a apyókxoho sétleykha nak chá'a apmáheyo heyaqhek! ¡Hemallahanches, hakte máxa yámakméwa m'a; hetnéssesek katnehek nekha'a étkók, keñe méko hewagkasek teyp!

³ Dios Wesse' ahagkok, ¿yaqsa aqsok séláneya ko'o? ¿Éláneyak enxeykel'a ko'o aqsok ekmaso?

⁴ ¿Ekmaso enxeykel'a ekyaqmagkáseykekxak setnéssessamakxa ektaqmela émók? ¿Ektawáseykegkók enxeykel'a ko'o meykexho ektáhakxa m'a sénmexma nak?

⁵ Ektemék sa' agko' xa, hémheykha sa' ma'a sénmexma nak; hethanyekxak sa', tén sa' héñawasha náxop, éttelegwasha sa' náxop ma'a ektémakxa nak ekha séláyo.

⁶ ¡Wesse', yempekxa néten elwok! ¡Elenmexekxa m'a sélenmexma apkello nak! ¡Hepásegwata'! xép appekkenma axta appeywa hentaqmelchessásekxak negheykha

⁷ Ewakhésap ma'a pók aptémakxa nak chá'a énxet, epekken aptaháno m'a néten apyetseksa'ák nak apheykegkaxa'.

⁸ Wesse', elyekpelkohok chá'a exchep ma'a pók aptémakxa nak énxet'ák: hékpelkoho ko'óxa ektémakxa nak meyke sektémakxa; hékpelkoho ko'óxa ektémakxa nak ektaqmalma sektémakxa.

⁹ Dios appéwomo, apkelányo nak chá'a ektémakxa élchetámeykha egwáxok, tén han ekxéneykha egwáxok kañók agko', ¡emasséssem apkeltémakxa ekmaso m'a élmasagcha'a nak apkeltémakxa, eyke ewasqakkas neyseksa apha m'a énxet meyke nak aptémakxa!

¹⁰ Cha'a semasma ko'o m'a Dios apha nak néten, apwagkassamo nak chá'a teyp ma'a énxet apkelyeheykekxoho nak chá'a.

¹¹ Dios apteme segyekpelchémo ekpéwomo aptémakxa, aptaqnagkamo nak chá'a nentémakxa ekmaso yókxoho ekhem.

¹² Sa' agkok ey'aweykxak énxet ma'a Dios, emaxneyekxak sa' sókwenaqte apagkok ma'a Dios; apkeykessek axát'ák yágke apagkok peya yahaxtaqpog,

¹³ apmátchessek yágke aktek eyáléwomól'a naw'a, ¡apmákxeyk apmeykha segaqhamól'a!

¹⁴ Kóllano m'a ekmaso nak aptémakxa: chássek apwáxok, etekkesek sa' ma'a nentémakxa ekmaso, etekkesek sa' han ma'a negmowána amya'a.

¹⁵ Apmetmeyk máxek ekmattawóneg agko', etyemekxohok sa' eyke apagko' ma'a máxek apagkok nak.

¹⁶ ¡Kápekxak sa' ma'a aptémakxa ekmaso, tén han apyennaqteyáseykha apyempehek!

¹⁷ Alteméssesek sa' ko'o apcheymákpoho Wesse' egegkok, hakte péwók aptémakxa m'a; anneykmássesek sa' ko'o apwesey Wesse' egegkok, apwesey nak Meyke Ekhémo.