Salmos 68 - Biblia Enxet

Énxet'ák Israel apkelmallanma

¹ Apkempákxeyk agkok chá'a néten Dios, yexpaqnek chá'a m'a apkelenmexma, yenyahagkok chá'a apmonye' m'a aptaqnagko nak chá'a;

² elmassegwók aqsa chá'a ektémól'a éten kamassegwók, elpayhekxak chá'a, ektémól'a pápa' kólpekkenek nátex; ¡emassegwók chá'a nápaqtók Dios ma'a élmasagcha'a nak apkeltémakxa!

³ Kalpayhekxak eyke chá'a apkelwáxok ma'a ektaqmalma nak apkeltémakxa; kalpayhekxohok agko' chá'a apkelwáxok nápaqto' Dios, ¡elnextegmakha chá'a néten elátsaha!

⁴ Kólmeneykmásses chá'a kéxegke m'a Dios, kólmeneykmásses chá'a negmeneykmasso kólxének apwesey; kólpeykesho chá'a kéxegke m'a apxegamo nak chá'a néten yaphope. ¡Kólmés chá'a ekpayheykekxa kélwáxok Wesse' egegkok! ¡Kalpayhekxa chá'a kélwáxok nápaqto'!

⁵ Dios, aphama nak cha'a m'a tegma appagkanamap apagkok, cha'a apteme chá'a apyapmeyk ma'a apkelyéheykha nak, tén han apkeltaqmelchesso m'a xentampe'e nak.

⁶ Egkések chá'a aphamakxa Dios ma'a aptaqmópeyak nak chá'a, elántekkesek chá'a m'a apkelmomap nak, egkeyásekxa chá'a ektaqmalma apheykha; exmakha sa' eyke chá'a xapop ekmaso nak ma'a élmasagcha'a nak apkeltémakxa.

⁷ Oh Dios, xama axta apxegama exchep apmonye'e m'a énxet'ák apagkok, apyeykheykekxo m'a yókxexma meykexa nak aqsok,

⁸ yawheykha axta xapop, máméyak axta han ekyawe agko', kelpexyennamomchek axta apmonye' m'a Dios nak Sinaí, cham'a Dios nak Israel.

⁹ Oh Dios, apmáméssegkek axta exchep ekyawe agko'; apkelyampayók apagko' axta m'a énxet'ák apagkok, apkelmeyáseykekxeyk axta eyke exchep apkelyennaqte.

¹⁰ Apkelheykmek axta énxet'ák apagkok ma'a, oh Dios, apkelméssegkek axta eyke exchep eyeyméxchexa aqsok ma'a meyke nak aqsok apagkok, eñama ektaqmeleykha apwáxok.

¹¹ Apméssek axta appeywa Wesse' egegkok; xámok axta han kelán'ák élsóncha'a m'a aptáhakxa appeywa. Axta entáhak chá'a s'e:

¹² “¡Apkenyahágkek kelwesse'e yetlo sẽlpextétamo apagkok!” Melasséxchek axta han aqsok élyementaméyak élenmexma m'a kelán'ák, cham'a axanák nak,

¹³ keñe kéxegke kélheykekxo aqsa m'a élyáqtamakxa nak kélnaqtósso. ¡Kelmágkek axta m'a wáx'ay apxempenák kélyepetchesso nak sawo ekmope ekmomnáwa! ¡Apwa' élyenméyak nak sawo ekyátekto ekmomnáwa!

¹⁴ Apteyekmek axta han yeyam egkexe Salmón, apmenxena axta Dios ekha apyennaqte m'a kelwesse'e apkelwányam.

¹⁵ ¡Netna'awók agko' neykel'a egkex'a nak Basán, netna'awók agko' neykel'a m'a naw'ék nak!

¹⁶ Kéxegke kélteme nak egkexe netna'awo', ¿yaqsa ektáha kélnatha'a nak kéllano m'a egkexe yaqweykenxa nak exek ma'a Dios? ¡Exek sa' chá'a meyke néxa Wesse' egegkok ma'a!

¹⁷ Xámok agko' yátnáxeg apkelyenyawasso apagkok ma'a Dios; Sinaí apkeñamak apmeyánto m'a tegma appagkanamap apagkok, yetlo m'a yátnáxeg apkelyenyawasso nak.

¹⁸ Oh Dios, apxámok xép apnaqlákxo énxet'ák apkelmomap apmeyákxo m'a netno' agko' nak; apkelxakak nahan chá'a m'a aqsok apkelmésso m'a énxet'ák, wokmók nahan apkelmeyásamap ma'a apkenmexeykekxa nak chá'a exchep, Wesse'.

¹⁹ ¡Tásek sa' chá'a katnehek xép apxénamap Wesse' egagkok, Dios egagkok, Sẽlwagkasso nak teyp, yókxoho ekhem chá'a apkelpatmeykha m'a nélpata ekyentaxno nak!

²⁰ Dios egagkok apteme xama Dios segwagkassamo nak teyp, apwanchek hégketchesek nétsapma.

²¹ Elpáxqatchesek sa' apqatkok Dios ma'a apkelenmexma nak, apqatkok nak ma'a melwáteséyak nak apkeláneyak melya'assáxma.

²² Aptáhak Wesse' egegkok se'e: “Anaqlósawakxak sa' ko'o makham kélenmexma apkeleñama m'a Basán nak; anaqlósawakxak sa' makham apkeleñama m'a wátsam ekwányam ekmattawóneg nak,

²³ yaqwayam sa' kólyássesek kélmagkok éma apagkok ma'a kélenmexma nak, tén han keynagkok ma'a kélnaqtósso semheg nak.”

²⁴ Oh Dios, Dios ahagkok, Wesse' apwányam ahagkok, apkelwetákpek apkelxegakmo énxet'ák ma'a tegma appagkanamap apagkok, apkelsawássessamo nak xép eñama apkelmallanma.

²⁵ Apmonye'e apkelxegak ma'a apkelmeneykmasso nak, keñe axayók ma'a apkelpáwasso nak, keñe kelán'a étkók élxega m'a neyseksa nak, yetlo élpáwasso m'a élaqtáwáseykha.

²⁶ ¡Kólpeykesho chá'a kélyókxoho kéxegke m'a Dios Wesse' egegkok! ¡Kólpeykesho chá'a kélyókxoho Israel kélaqnákxoho nak se'e!

²⁷ Apmonye' apxegak ma'a Benjamín, apsexyo nak, keñe neptámen apxámokma apkelámha amonye'e nak Judá, Zabulón, tén han Neftalí.

²⁸ Dios ahagkok, henxekmós apmopwána; ¡hentemessásekxa makham ma'a senteméssessamakxa axta negko'o sempasmoma!

²⁹ Keñe m'a tegma appagkanamap apagkok netno' nak, cham'a Jerusalén, apkelseykekxéssamakxa nak chá'a apkelmésso naqsa aqsok ma'a kelwesse'e apkelwányam,

³⁰ epaqhetches sa' Egipto, cham'a aqsok nawhak ekleykha nak neyseksa ekho', cham'a weyke kelennay'a ekxámokma éllo nak, tén han weyke étkók élmámenyého nak ma'a aqsok ekxámokma, eknaqtawáseykegkoho nak chá'a énxet'ák; ¡yexpánches sa' ma'a énxet'ák ekmátsa nak chá'a elanagkok kempakhakma!

³¹ Egipto sa' eleñék apkelámha apmonye'e kélásenneykha; elya'ássesek sa' néten apmék Dios elmaxneyagkok ma'a énxet'ák Etiopía.

³² ¡Kólmeneykmásses Dios kélheykha nak ekyókxoho apkelókxa keso náxop, kólmeneykmásses negmeneykmasso m'a Wesse' egegkok,

³³ cham'a apxegamo nak chá'a netno' nak, néten nanók ekyetnamakxa nak! Kóleyxho ektáhakxa éxtegyawà appeywa, cham'a appeywa ekyennaqte nak.

³⁴ Kólyekpelkoho Dios apmopwána: sawheykekxók apcheymákpoho m'a kañe' Israel, weykmok apmopwána m'a netnók agko' nak yaphope ekyápaqmate.

³⁵ Yeykpok chá'a Dios, aphama nak ma'a tegma appagkanamap apagkok; Elmések chá'a apkelmopwancha'a, tén han apkelyennaqte énxet'ák apagkok ma'a Dios apagkok nak Israel. ¡Tásek sa' chá'a katnehek apxénamap ma'a Dios!