Salmos 66 - Biblia Enxet

Keltásók agko' xép aqsok apkelane

¹ Kólmeneykmásses Dios, kélyókxoho kélheykha nak keso náxop yetlo ekpayheykekxa kélwáxok;

² kólmeneykmásses negmeneykmasso m'a apwesey eyeymáxkoho nak; kólmeneykmásses negmeneykmasso ektaqmalma eñama apteme apwányam apagko'.

³ Kólteme kólának Dios se'e: “Keltásók agko' xép aqsok apkelane. Apmopwána ekyawe keñamak xép apkelpexyennama apmonye' m'a apkelenmexma nak;

⁴ apyókxoho énxet'ák apkelpeykásawók xép apheykha nak keso náxop, apkelmeneykmássessek han ma'a negmeneykmasso apkelxéna apwesey.”

⁵ Kólchexyem, kólteyánegwatámho Dios apkelane aqsok, aqsok sempelakkasso apkelánesso axta m'a énxet'ák:

⁶ xapop ekyamaye axta aptemessáseykekxak ma'a wátsam ekyawe nak, keñe axta m'a ẽlyapmeyk nano' axta negko'o apkelyeykheykekxo náxop ma'a wátsam nak; ¡axta nenlánegweykmok nélsawássessamo ekyókxoho senteméssessamakxa axta Dios ma'a!

⁷ Apmopwána keñamak aptéma wesse' apwányam meyke néxa; meyenyókáseykha apaqtek apkeláneykencha'a m'a apkelókxa nak, yaqwayam enxoho melenmexekxék ma'a énxet'ák apkelenmexeykekxoho nak chá'a.

⁸ Énxet'ák, ¡kaltaqmalmakha kélpeywa kólxének Dios egagkok! ¡kóllegaksoho m'a negmeneykmasso nélpeykessamo nak!

⁹ Hakte cha'a keñamak nélweynchámeykencha'a negko'o makham ma'a; megyahayók hẽlpelápagkasek.

¹⁰ Dios egagkok, apkelányok negko'o exchep nentémakxa yaqwayam ékpelkoho', ¡ẽláxñáseykekxe', máxa enteméssessók ma'a kéltémól'a sawo ekmope kólaxñásekxa'!

¹¹ Egáhakkasseykteyk yám'én; empátegkessegkek aqsok ekyentaxno agko'.

¹² Apchahayók han sẽlteyammeykencha'a m'a sẽlenmexma nak; nélmalláneykekxeyk chá'a negko'o m'a yegmen, tén han táxa, ẽlwagkassa'ak eyke yaqwánxa óllókasek nélyampe.

¹³ Atxek sa' ko'o tegma appagkanamap apagkok, tén sa' almések aqsok sélwatno; keñe sa' alának ma'a aqsok séltennasso axta alána',

¹⁴ cham'a séltennassama axta alána', sekweteya axta ekmaso sekha.

¹⁵ Almések sa' ko'o exchep aqsok sélwatnésso kélnaqtósso seknaqmelasso nak; almések sa' ma'a weyke kelennay'a, tén han yát'ay apkelennay'a nak, tén han ma'a nepkések apkelennay'a sélnapma nak.

¹⁶ Kólchexyem kélyókxoho, ¡kélaye nak chá'a Dios! ¡Kóleyxho sa', peya nak altennasha setnéssessamakxa ko'o m'a!

¹⁷ Ekpaqmeyesmeyk axta ko'o sekwóneykencha'a, ekmeneykmássessegkek axta sélpeykessamo.

¹⁸ Asagkek axta agkok ko'o élchetamso ewáxok, meheyéxók axta m'a Wesse' egegkok;

¹⁹ ¡ehaxnawók axta eyke, apmeyk axta han takha' sélmaxnagko!

²⁰ ¡Apcheymákpoho sa' chá'a kólteméssesek Dios, apmoma axta takha' sélmaxnagko, sexekmóssama axta seyásekhayo!