Salmos 64 - Biblia Enxet

Nélmaxnagko néltémo hentaqmelchesek Dios

¹ Dios ahagkok, yeyxho sekpaqméteykha eñama seyápagqánamaxche'; hemyow nepyeseksa m'a sélenmexma apkello nak.

² Hekpós ko'o apmonye'e m'a élmasagcha'a nak apkeltémakxa, cham'a apkelyexamakpoho nak chá'a apkeláneykekxa apkelpaqmeyesma yaqwánxa hetnéssesek; hemallahanches ko'o élxeyenmakxa nak chá'a apkelwáxok hetnéssesek ma'a élmasagcha'a nak apkeltémakxa,

³ apkeláneykekxa nak chá'a yaqwánxa etnehek apkelpeywa, ektémól'a sókwenaqte kólmaxneyekxa', melmágweykekxa nak chá'a apkelpeywa elpaqmétek ekmaso, ektémól'a yágke kólhaxtaqpog, segaqhamól'a hegyaqxa'.

⁴ Elyátak chá'a énxet meyke nak apkeltémakxa m'a apkelyexanmomakxa nak, etlakkasek chá'a elyáta', meyke apkelegweykekxa'.

⁵ Elyáteyakpok chá'a emáwhok elanagkok aqsok ekmaso; elanagkokxak chá'a aptamhágkaxa ekpósek epekkenek kelhanma, yának chá'a megkóteyáxchek aptamhágkaxa,

⁶ yának han chá'a méko kategyaha amya'a apkeltémakxa ekmaso. Sa' eyke etegyaha amya'a apkeltémakxa m'a apya'áseykegkoho nak kañók agko' élchetamso apwáxok énxet.

⁷ Dios sa' eyke elyátak ma'a yágke apagkok, etlakkasek sa' elyensasagkok;

⁸ apkelpeywa apagkók sa' kálsexnáneyekxa', elesmaksek sa' chá'a m'a ektáha nak chá'a apkelwete.

⁹ Keñe sa' apyókxoho énxet etnehek apcháyo m'a Dios, tén han elxének chá'a m'a aqsok apkelane; elya'asagkohok sa' han ma'a aqsok apkelane nak.

¹⁰ Kalpayhekxak sa' apkelwáxok énxet'ák éltaqmalma nak apkeltémakxa, apkelwet'a sa' apteméssesakxa m'a Wesse' egegkok, keñe sa' elyo'ókxak yának eltaqmelchesek, kalpayhekxak sa' apkelwáxok ma'a apyókxoho énxet'ák meyke nak apkeltémakxa.