Salmos 6 - Biblia Enxet

Ekyentaxno apháxamap apkelmaxnagko

¹ Wesse', náhetaqnow aqsa ko'o aplawa enxoho, ná heñássesagkoho aqsa ko'o setaqnawaya enxoho.

² Wesse', yepyósho ko'o hélano', hakte ekyelqáxcheyk ko'o. Wesse', hegkeyásekxa sekyennaqte, kelpexyennegkek ko'o ekyókxoho émpehek.

³ ¡Pexyennegkek ewáxok seyeye! Wesse' ¿háxko sa' ekwánxa hey'óta'?

⁴ Wesse', émpoho, ¡hewagkasseta ko'o teyp!, ¡hewagkas teyp eñama seyásekhayo!

⁵ Mopwanchek xép kaxének apwáxok ma'a apketsapma nak; ¿Yaqsa kalpeykeshok xép ma'a takhaxpop nak?

⁶ Eyélaqtéssek ko'o m'a sélekxagweykha. Yókxoho axta'a sélekxagweykha, yássessegkek ahaqta'ák égmen'ák ma'a sekteyáyam nak.

⁷ Kelhánaqtéssegkek sélyeheykha m'a seklegeykegkoho ekmáske; ¡kelhánaqtegkek ahaqta'ák eñama m'a sélenmexma!

⁸ ¡Kólántép sekhakxa, élmasagcha'a nak kéltémakxa, apleg'ak Wesse' egegkok ma'a ektémakxa ekxegeykha egkenyek!

⁹ Apleg'ak Wesse' egegkok sekwóneykha, ¡apmeyk ko'o takha' sélmaxnagko Wesse' egegkok!

¹⁰ Elyegwáwhok apagko' sa' ma'a sélenmexma nak, elasmésakpok sa'; ¡ekmanyehe agko' sa' elxeganmok eñama apkelmegqakto!