Salmos 57 - Biblia Enxet

Nélmaxnagko néltémo hempasmok Dios

¹ Dios ahagkok, yepyósho ko'o hélano', yepyósho hélano', hakte ekya'aweykteyk xép séltamho hemyók. Axnaták sa' ko'o kóneg apxempenák yaqwayam hemyók, ekwokmoho ekyeyk'a m'a aqsok ekmaso.

² Awónmakha sa' ko'o m'a Dios meyke nak ekhémo, cham'a Dios sepasmo nak chá'a ekyókxoho setnamakxa.

³ Néten sa' kañék heyátegmowagkok tén sa' hewagkasek teyp, nepyeseksa m'a énxet'ák apkellómo apagko' nak setwáseykegkoho, hexekmósek sa' ko'o seyásekhayo m'a Dios, tén han apteme apmámnaqsoho.

⁴ Ekyetnegkek ko'o náxop neyseksa yámakméwa ektómo nak chá'a énxet; máxa sawhéwa m'a am'ák nak, tén han yágke aktek, keñe m'a axkok nak, ekhawo m'a sókwenaqte ekmahantal'a.

⁵ Dios ahagkok, aphegkek xép ma'a teyp nak néten. ¡Sawheykekxók xép apcheymákpoho nélwanmeygkaxa!

⁶ Epekkenchessegkek ko'o emonye' kelhanma m'a sélenmexma nak, yaqwayam enxoho heyelaqtések; emétegkessegkek máxek ámay ahagkok, appalleykekxók apagko' eyke m'a máxek apagkok nak.

⁷ Dios ahagkok, ekpenchessek eyke ko'o séláneykekxa ewáxok, ekpenchessek séláneykekxa ewáxok, yaqwayam anneykmássesek negmeneykmasso.

⁸ Ewáxok, kaxatakha'; exatakha' arpa, tén han yát'axpog, ¡axatakhak sa' ko'o axto'ók agko'!

⁹ Wesse', alpeykeshok sa' ko'o exchep nepyeseksa énxet'ák, anneykmássesek sa' nepyeseksa pók aptémakxa nak énxet'ák.

¹⁰ Hakte awanhek xép segásekhayo, weykmok ma'a néten nak, weykmok ektémakxa mehegyenyaweykha m'a yaphope ekyápaqmate nak.

¹¹ Dios ahagkok, aphegkek xép ma'a teyp nak néten. ¡Sawheykekxók xép apcheymákpoho nélwanmeygkaxa!