Salmos 56 - Biblia Enxet

May'ásseykmok ko'o Dios eyáyók han appeywa

¹ Dios ahagkok, yepyósho ko'o hélano', hakte yetneyk énxet sénmexeykha nak; yókxoho ekhem sektámeykenta', tén han setwáseykegkoho.

² Yókxoho ekhem ko'o sénmexeykha m'a sélenmexma nak; apxámok apagko' ma'a énxet'ák sektámeykenta nak chá'a ko'o, yetlo éleymáxkoho apkelwáxok.

³ Yetneyk agkok chá'a ko'o seyekakxa', may'ássemek chá'a exchep.

⁴ May'ásseykmok ko'o Dios, eyáyók han appeywa; may'ásseykmok ko'o Dios, méko seyekakxa'. ¿Háxko apwanchek ko'o hetnéssesek énxet?

⁵ Yókxoho ekhem sepaqhetchesseykta ekmaso; wánxa aqsa élxeyenma apkelwáxok hetnéssessamhok exma ekmaso.

⁶ Elyexanmaha chá'a hélanha sekmahágkaxa enxoho, eleyxek chá'a kataqmelekxak sete, yaqwayam heyaqhek.

⁷ ¿Megkóllegássesagkoya sa' eñama apkeltémakxa élmasagcha'a? O Dios, etnessásekxa mékoho énxet'ák yetlo aplo.

⁸ Apya'ásegkok xép sélyexanmeykencha'a; apkelyetsáteykegkek xép ekwánxa ahaqta'ák égmen'ák. ¿Ya etáxéssók xép weykcha'áhak apagkok xa?

⁹ Yenyahagkok sa' sélenmexma séltamho enxoho hepasmok xép. Ekya'ásegkók ko'o Dios sepasmoma.

¹⁰ May'ásseykmok ko'o Dios, eyáyók han appeywa; may'ásseykmok ko'o Wesse' egegkok, eyáyók han appeywa;

¹¹ may'ásseykmok ko'o Dios, méko seyekakxa'. ¿Háxko apwanchek ko'o hetnéssesek énxet?

¹² O Dios, alának sa' ko'o m'a aqsok séltennasso axta alána', alának sa' yetlo sélteméssesso apcheymákpoho,

¹³ hakte emallahanchessek ma'a nétsapma, megya'awok ayaqnenek héltemessásekxak kóneg, yaqwayam enxoho aweynchamha chá'a nápaqtók Dios, neyseksa élseyéxma segméssamo nak chá'a ekyennaqte egnények.