Salmos 52 - Biblia Enxet

Eyaqhémo exénmakha aptémakxa énxet ekmaso nak aptémakxa

¹ ¿Yaqsa ektéma apxéneykencha'a nak chá'a aptémakxa ekmaso, xép apyennaqteyásamákpoho nak chá'a? ¡Megkayaqmagkassemek ektémakxa m'a Dios segásekhayo!

² Wánxa aqsa ekxéneykencha'a apwáxok elának ma'a aqsok ekmaso, sensexnenagkamo m'a appeywa, máxa sawo ekmahanta m'a apaxkok.

³ Apmenyeyk ma'a aqsok ekmaso, keñe aqsok ektaqmela mopmenye', apmenyeyk xép ekmowána amya'a, keñe aqsok ekmámnaqsoho mopmenye'.

⁴ Apmopwána amya'a exchep, apmenyeyk chá'a egkések appeywa ekmaso pók éntaxnéssesek apwáxok.

⁵ Emasséssamhok apagko' sa' eyke han xépxa m'a Dios: emok sa', keñe sa' etekkesek ma'a apxagkok nak; yaqhek sa'.

⁶ Elwetak sa' ektáha nak chá'a apkelyaheykekxoho Dios xa, keñe sa' yeyk chá'a; yesmésakpok sa' eyke xa énxet nak, sa' etnehek elpaqmétek se'e:

⁷ “Kóllano mey'eykekxa nak chá'a Dios yaqwayam emyók; apchásenneykekxo nak chá'a ekxámokma agko' aqsok apagkok, melwátésseyam nak chá'a apkelane aptémakxa ekmaso.”

⁸ Ekhawók eyke ko'o olivo yámet éltaqmalma nak áwa' m'a Dios tegma appagkanamap apagkok; ¡may'ássemek sa' chá'a m'a ektémakxa nak segásekhayo!

⁹ Oh Dios, agkések sa' chá'a ko'o exchep ekxeyenma ewáxok, eñama m'a setnéssessamakxa nak chá'a; axének sa' ko'o exchep aptémakxa aptaqmalma nápaqta'awók ma'a énxet'ák melyenseyam nak chá'a apkelyetleykha.