Salmos 50 - Biblia Enxet

Dios apteme segyekpelchémo appéwomo

¹ Appaqmetchek Wesse' egegkok, cham'a Dios apteme nak néten ekyókxoho m'a aqsok kéláyókxa; apkelwóneyha apheykha nak keso náxop, cham'a teyapmakxa ekhem nak, tén han ma'a taxnegwánxa ekhem.

² Kelyenmeyk Dios élseyéxma apagkok ma'a ekpayho nak Sión, tegma apwányam aptaqmalma meyke ekhémo.

³ Apxegakmek Dios egagkok, makke ewanmeyakmok, xegakmek apmonye' m'a táxa ekmassésseykmoho nak ekyókxoho aqsok, wakha'ak éxchahayam ekyennaqte agko' ma'a nepyáwa'.

⁴ Apkelwóneyha Dios néten, tén han xapop, apkeltamho katagkohok apmáheyo elyekpelchásseshok ma'a énxet'ák apagkok, cham'a aphamakxa nak netnók agko':

⁵ “Hélánchessásekxa ko'o aptáha nak chá'a melyenseyam sélyetleykha, aphéssamo axta mók sélpaqhetchásamáxkoho, segkéssama m'a aptósso apchaqhe.”

⁶ Xénchek néten Dios aptáha segyekpelchémo appéwomo.

⁷ “Kóleyxho, Israel, kélteme nak énxet'ák ahagkok; altennásekxohok sa' ko'o kéxegke ekmasagko kéltémakxa. ¡Ko'o sekteme Dios! ¡Ko'o Dios kélagkok!

⁸ Mataqnawássessók ko'o m'a kélnaqtósso kélnapma, tén han aqsok kélwatno sélméssama nak chá'a ko'o.

⁹ Malmaxnagkok ko'o kéxegke weyke kelennay'awók kélnaqtósso, tén han ma'a yát'ay apkelennay'a apkelyáqto nak aphaxta kélagkok,

¹⁰ hakte ahagkok ko'o m'a ekyókxoho aqsok nawha'ák nak, tén han aqsok kélnaqtósso élleykha nak neyseksa egkexe;

¹¹ ahagkok nahan ma'a náta élchampeykha nak neyseksa meteymog élekhahéyak, tén han ma'a ekyókxoho aqsok élweynchámeykha nak yókxexma.

¹² Meyk agkok ko'o eyaqhak, malmaxnayhek ko'o kéxegke sekto, hakte ahagkok ko'o s'e nélwanmeygkaxa nak, ekyókxoho aqsok ekhéyak nak ma'a kañe'.

¹³ ¿Atwohoya chá'a ko'o weyke kelennay'awók ápetek? ¿Eynhoya chá'a ko'o yát'ay apkennawók éma apagkok?

¹⁴ ¡Kóltemésses aqsok kélmésso naqsa ekxeyenma kélwáxok ma'a Dios; kóllána aqsok kéltennasso axta kóllanaksek ma'a Meyke nak Ekhémo!

¹⁵ Hélwónmakha chá'a ko'o ekwa'a enxoho ekyentaxno kélheykha; ko'o sa' almallahanchesek, tén sa' kéxegke hélpeykeshok chá'a.”

¹⁶ Keñe axta m'a élmasagcha'a nak apkeltémakxa etnehek chá'a yának Dios se'e: “Megkapayhawok kéxegke kóllegaksek segánamakxa ahagkok, tén han kólxének ma'a ekhémo mók nélpaqhetchásamáxkoho ahagkok,

¹⁷ megkalcha enxoho kélwáxok alxekmósagkok, tén han megkólámenyého enxoho m'a sekpeywa.

¹⁸ Kólmok chá'a takha' kéxegke m'a apkelmenyexma nak; ¡kélyepetcheykekxeyk ma'a apnaqtawáseykegkoho nak chá'a apnaqteyegka'a!

¹⁹ Yahamók chá'a kólpaqmétek peya enxoho kólxének aqsok ekmaso, tén han peya enxoho kóltéhek chá'a kélmowána amya'a, megkólmágwakxeyk chá'a.

²⁰ Kólxénmakha chá'a ekmaso kélnámakkok, ¡Kólenmexmakha chá'a kélyáxeg'a kélagko' nak!

²¹ Cháxa kéltémakxa kéxegke xa ektáha nak, ekwanmagkamchek eyke aqsa ko'o; ¡kélanagkamchek axnémók ko'o kéxegke! Kélnápaqta'awók sa' ko'o alxénchásekxohok kéltémakxa, ¡ayaqmagkásekxak sa' mók kéltémakxa!

²² “Kólya'asagkoho sa' se'e, kéxegke megkaxeyenma nak kélwáxok Dios, kélnápakha'a apketkók katnehek atnéssesek, méko kalwagkasek teyp:

²³ énxet segkésso nak chá'a ekxeyenma apwáxok, cháxa seyáyo ko'o xa. ¡Awagkashok chá'a ko'o teyp ma'a aptaqmelchásamákpoho nak chá'a sétleykha!”