Salmos 46 - Biblia Enxet

Apheyk negyeseksa negko'o Wesse' egegkok

¹ Dios apteme negko'o segmasma, tén han segyennaqtésso, apteme han sempasmo ekwa'a enxoho ekmaso negha.

² Sa' kañék magaye negko'o xa, kapaqxek sa' eykhe xapop, kalweywagkok sa' eykhe egkexe m'a kañók agko' nak wátsam ekwányam,

³ kapáwak sa' eykhe awáxok wátsam ekwányam, kalnextegmakha sa' eykhe élyaqyahayam agkok, kalyawheykha sa' eykhe egkexe eñama ekyennaqte élnextegeykha.

⁴ Yetneyk xama wátsam ekpeykessáseykekxo nak apwáxok Dios tegma apwányam apagkok, tegma apkelyawe apkelpagkanamap apagko', apagkok nak ma'a Dios Meyke Ekhémo.

⁵ Aphegkek Dios xa kañe' nak, megyohók sa' katnégwomhok exma; Dios sa' nahan chá'a epasmok ma'a élsaka enxoho.

⁶ Kalpayheykha chá'a apatña'ák énxet'ák, elpexyennók chá'a énxet apheykha nak apkelókxa, kapaqxek chá'a xapop apkellegásawo enxoho chá'a appeywa énxet'ák ma'a Wesse' egegkok.

⁷ ¡Apheyk negyeseksa negko'o Wesse' ekha nak apyennaqte! ¡Cha'a apteme sentaqmelchesso negko'o m'a Jacob Dios apagkok nak!

⁸ Kólteyánegwoho aqsok sempelakkasso nak agwetak apkelane Wesse' egegkok keso náxop:

⁹ apmasséssekmek kempakhakma, ekweykmoho m'a néxa xapop nak keso nélwanmeygkaxa; apkelekkexchek ma'a yágke, nekha'a étkók aptemessásak ma'a sawhéwa, ¡apkelwatnékxeyk ma'a yátnáxeg apkelyenyawasso apkenchesso nak kempakhakma!

¹⁰ “¡Kólwatés kélnápomáxche'! Kólya'asagkoho sektáha ko'o Dios! ¡Ko'o sekteme néten agko' nepyeseksa m'a pók aptémakxa énxet'ák! ¡Ko'o sekteme néten agko' ekyókxoho keso náxop!”

¹¹ ¡Apheyk negyeseksa negko'o Wesse' ekha nak apyennaqte! ¡Cha'a apteme sentaqmelchesso negko'o m'a Jacob Dios apagkok nak!