Salmos 45 - Biblia Enxet

Kélmeneykmássesso wesse' apwányam élyamhopma

¹ Lanawók ko'o ewáxok amya'a ekmátsa; hawók ahaxkok ma'a táxésso apmeykencha'awól'a m'a apmopwána nak etaxaksek. ¡Alyetsetchesek sa' ko'o amya'a ekmátsa ahagkok nápaqtók wesse' apwányam!

² ¡Xép apteme aptaqmalma apagko' nepyeseksa m'a énxet'ák! ¡Tásek chá'a katnehek appeywa! Cháxa keñamak apteméssessama nak apkeleñémo Dios megkatnégwayam néxa.

³ ¡Etétekxa nepxet sókwenaqte apagkok, xép apteme nak apyennaqte! ¡Katxohok chá'a exchep emha xa, xép apteme nak apcheymákpoho!

⁴ Exeg, yaqwayam emallánek yetlo apcheymákpoho, eñama apmasma m'a aqsok ekmámnaqsoho, tén han etaqmelchessásekxak apheykha m'a élyelqamáxkoho nak apkelwáxok. ¡Apyennaqte exchep keñamak apmallanma apagko'!

⁵ Ahamtakcha'ak xép yágke aktek apagkok, wesse'; kalyaqxák chá'a aphekhek ma'a apkelenmexma, elmok chá'a exchep ma'a pók aptémakxa énxet'ák nak.

⁶ Oh Dios, megkamassegwomek xép ma'a aptémakxa wesse' apwányam, kapéwhok chá'a apkelánéseykekxa apheykha énxet'ák.

⁷ Yásekhohok chá'a m'a aqsok ektaqmela, etaqnók chá'a m'a aqsok ekmaso nak. Cháxa keñamak apkelyéseyncha'a nak Dios, cham'a Dios apagkok nak, apyánchessamók han apmésso m'a ekpayheykekxa apwáxok, kaxnók ma'a apkelxegexma'a nak.

⁸ Apkelpaqneykmók apkelnaqta m'a aqsok ánek ekmátsa nak ekpaqneyam, tén han áloe, tén han canela; kélpeykessáseykekxeyk apwáxok kélpáwássessama yát'axpog ma'a apxagkok apkelyawe nak, kélnáxegkáseykha nak yánnapóxeg apma'ák.

⁹ Heykha han kelwesse'e étkók neyseksa m'a kelán'ák ekheykha nak ma'a aphamakxa nak; kenmeykha han ekpayhókxa apkelya'assamakxa aphamakxa m'a wesse' ekwányam, yetlo ekwakhésamaxche m'a sawo ekyátekto élmomnáwa éltaqmalma agko' nak.

¹⁰ Wesse' apwányam appagkanma, keyxho sekmakókxa nak atnehek wána': Nágkaxén aqsa kaxwók awáxok námakkok, tén han énxet'ák agkok,

¹¹ hakte apmenyeyk xeye' apkelano wesse' apwányam ektémakxa nak ektaqmalma; cha'a apteme exche' wesse' agkok ma'a, payhawók kalyahakxoho'.

¹² Peyk elsókasegmak xeye' aqsok apkelmésso naqsa m'a énxet'ák Tiro, cham'a apkelwesse'e apancha'awo nak yaqwayam kataqmalmakha awáxok kalano'.

¹³ ¡Cháxa ekxegakmo wesse' étkok xa, tásók agko'! ¡Sawo ekyátekto ekmomnáwa kélyetnaqte m'a ektaxno nak!

¹⁴ Apkeltaqmalma aptáxama ektaxno kélyentamak ma'a aphakxa nak wesse' apwányam, kelxegkek han natámen ma'a kelán'a élxegexma'a nak chá'a.

¹⁵ Kelxegakmek yetlo ekyawe agko' élpayheykekxa awáxok, atsek awáxok élántaxna m'a tegma apyawe apagkok nak wesse' apwányam.

¹⁶ Oh wesse' apwányam, etnahagkok sa' chá'a kelwesse'e apkelwányam ma'a apketchek, apkelyaqmagkasso m'a apyapmeyk nano', etnéssesagkok sa' apkeláneykha ekyókxoho apkelókxa'.

¹⁷ Wának sa' ko'o kaxénwakxohok chá'a apkelwáxok apwesey m'a kaxwe apkektegéyak nak, tén han ma'a peya nak elántépekxak makham axayo', tén han kaltaqmalma chá'a apkelpeywa exének ma'a énxet'ák meyke néxa.