Salmos 44 - Biblia Enxet

Nélmaxnagko néltémo hempasmok Dios

¹ Oh Dios, nenlege egagko' negko'o séltennáseykha m'a ẽlyapmeyk nano' axta, apteméssessamakxa axta chá'a apkelyennaqtamakxa axta, cham'a nentámen axta:

² meyke apmeykha axta apkelántekkessók xép ma'a énxet'ák melya'áseyak nak xép, apkellegassáseykegkók axta pók aptémakxa énxet'ák, keñe apkelhesseykmo ẽlyapmeyk negko'o m'a.

³ Háwe axta apmék, tén han sókwenaqte élmallahanchesso m'a ẽlyapmeyk; háwe axta apma xapop ma'a. ¡Xeyep apmopwána axta keñamak tén han apyennaqte! ¡Xeyep apha nepyeseksa axta keñamak, hakte apkelásekhayók axta!

⁴ ¡Wesse' Apwányam ahagkok! ¡Dios ahagkok! Xép axta apkelmallahanchesso énxet'ák apagkok;

⁵ xép sempasmo axta keñamak negmenxanma m'a nélenmexma; ¡xép apwesey axta keñamak nentemessáseykekxo kóneg ma'a ektáha axta chá'a segketámeyam!

⁶ Magwáyók ko'o yágke ahagkok, tén han sókwenaqte ahagkok hemallahanchesek;

⁷ xép keñamak negmassésseykmo m'a nélenmexma nak, xép aptemessáseykekxa' mékoho m'a sẽltaqnagko axta chá'a.

⁸ ¡Oh Dios, kaqheykha sa' chá'a negko'o egwáxok xép, ólpeykeshok sa' chá'a apwesey!

⁹ Keñe segkexaya kaxwo; mékoho entemessásekxa'. Massék apkelyetlawa m'a sẽlpextétamo egagkok nak.

¹⁰ Apkeltamhók xép ónyahagkok apmonye'e m'a nélenmexma; ẽlmenyexchásegkek aqsok egagkok ma'a sẽltaqnagko nak, apkelsákxeyk ma'a apmakókxa enxoho chá'a elsakxa'.

¹¹ Máxa nepkések entemessásak sẽlmésa kélnaqleykekxal'a aptekyómakxa; ẽxpánchessek sẽlya'asa nepyeseksa m'a énxet'ák melya'áseyak nak xép;

¹² meyke ekmomnáwa agko' apkexakhák énxet'ák apagkok, méko han aqsok ekwetassama eñama apkexakha.

¹³ Nélasmésamaxche enteméssessók; ẽltaqnaweykegkek ma'a apheykha nak negyáwa', ẽlya'ásseykmek han chá'a.

¹⁴ Apkeltémók chá'a exchep hẽlasmaksek ma'a melya'áseyak nak xép; egwet'ak agkok chá'a, élyeykesha chá'a apqatkok hegya'ássók.

¹⁵ Yókxoho ekhem ko'o sélteméssesso mékoho; ekháxaheykha sekmegqakto,

¹⁶ eñama m'a sélenmexma nak, apmáheyo nak chá'a hektámegma', tén han hetaqnók, tén han hetwasagkoho'.

¹⁷ Keso sentémakxa nak negko'o, háwe eñama megkaxeyenma nak egwáxok xép. ¡Magyetnakhassók ma'a ekhémo mók nélpaqhetchásamáxkoho apagkok!

¹⁸ Megkaxeyenmak egwáxok agyenyók xép, mólyetnakhágweykmok han ma'a ámay apagkok nak.

¹⁹ Keñe exchep sennaqtawáseykegkoho segkexakhagweykmo m'a élleykegkaxa nak semheg nawha'ák éllo. ¡Egáhakkassegkek ekyáqtessóxma ekmaso!

²⁰ Ẽlwagqámeykegkek axta agkok negko'o exchep, Oh Dios, nélpeykasawo enxoho m'a aqsok kéláyókxa eñama nak mók nekha,

²¹ ey'asagkohok axta exchep, hakte apya'ásegkok xép ektémakxa nak ekpaqméteykha kañók agko' apwáxok énxet.

²² Ketók eyke chá'a negko'o nentekyómakxa eñama negyetleykha exchep; máxa ẽlteméssessók ma'a nepkések kélnaqleykekxal'a aptekyómakxa.

²³ ¡Exatakha', Wesse'! ¿Yaqsa ektáha aptena nak? ¡Ná hegkexáwho apagko' aqsa!

²⁴ ¿Yaqsa ektéma apyexanmoma nak? ¿Yaqsa ektéma megkaxeyenma nak apwáxok negko'o, néllegeykegkoho egagko' nak?

²⁵ Nélyelqamáxcheyk negko'o, ẽlyettelegwáseykha náxop, mékoho ẽltemessáseykxa', náxop negheykegkok.

²⁶ ¡Etnemekxa néten, hempásegwata', hẽlwagkasseta teyp, eñama ekyawe segásekhayo!