Salmos 43 - Biblia Enxet

¹ Oh Dios, hexén ko'o meyke sektémakxa; ¡hepásegwata' heyátegmakkasagkok se'e énxet'ák melya'áseyak nak xép! ¡Hewagkas teyp nepyeseksa énxet'ák apkelmopwancha'a amya'a, tén han élmasagcha'a nak apkeltémakxa,

² hakte xép apteme Dios ahagkok, tén han setaqmelchesso! ¿Yaqsa ektéma sétnakhassama nak ko'o? ¿Yaqsa katnehek ko'o kayaqhapmakha ewáxok, eñama setwáseykegkoho m'a sélenmexma nak?

³ Heyaphásses ko'o élseyéxma apagkok, tén han aqsok ekmámnaqsoho apagkok, yaqwayam sa' ko'o hexekmósek ma'a ámay, ekmahéyak nak egkexe ekpagkanamaxche' apagkok, aphamakxa nak xép.

⁴ Keñe sa' ammok ma'a ekwatnamáxchexa nak aqsok apagkok xép, Dios, sa' alteméssesek apcheymákpoho m'a, yetlo sekpáwasso arpa, hakte epeykessáseykekxók ahagko' ko'o exchep ewáxok Dios ahagkok.

⁵ ¿Yaqsa katnehek ko'o kayaqhapwomhok ewáxok? ¿Yaqsa katnehek ko'o katneykha ewáxok? Élhaxanmeyk eyke aqsa m'a Dios, cham'a peya nak ko'o alenxanmohok sélpeykessamo. ¡Cha'a apteme ko'o Dios ahagkok ma'a, tén han Sewagkasso teyp!