Salmos 42 - Biblia Enxet

LIBRO 2 (Salmos 42—72 ) Dios nélhaxanma

¹ Dios ahagkok, temék ko'óxa sétamso exchep ma'a ektémól'a xenaq hem eyaqhe étamsól'a wátsam.

² Awanhek ko'o étamso ewáxok Dios, Dios memassegwayam nak. ¿Yaqsa sa' kexa ekhem awakxak aphakxa Dios yaqwayam alpeykesho'?

³ Yókxoho ekhem ko'o sélekxagweykha tén han yókxoho axta'a, yókxoho ekhem kélteme sélmaxneyeykha s'e: “¿Háxko aphakxa Dios apagkok?”

⁴ Xénwákxók agkok chá'a ko'o ewáxok xa aqsok nak, mamágwakxeyk chá'a kalekxagwaha ewáxok. Kaxénwakxohok chá'a ewáxok sélyetlama chá'a énxet'ák, seknaqleykekxo axta chá'a Dios tegma appagkanamap apagkok, yetlo nélwehéseykha élpayheykekxa egwáxok, tén han negmésso ekxeyenma egwáxok Dios. ¡Awanhek axta chá'a katnehek élpayheykekxa egwáxok!

⁵ ¿Yaqsa katnehek ko'o kayaqhapwomhok ewáxok? ¿Yaqsa katnehek ko'o katneykha ewáxok? Élhaxanmeyk eyke aqsa m'a Dios, cham'a peya nak ko'o alenxanmohok sélpeykessamo. ¡Cha'a apteme ko'o Dios ahagkok ma'a, tén han Sewagkasso teyp!

⁶ Awanhók agko' ko'o ekyaqhapweykmoho ewáxok. Cháxa keñamak ekxéna agko' nak ko'o ewáxok xép, cham'a yókxexma wátsam Jordán, tén han egkexe élekhahéyak nak Hermón, tén han Misar.

⁷ Anleghok ekpáwà awáxok ekyennaqte élpexyaweykenta yegmen ényé m'a xapop ekweyweykenta apagkok nak; eyapmeyk ko'o m'a yegmen ényé ekyennaqte apcháphasso nak xép.

⁸ Ekhem chá'a ko'o heyásekhohok Wesse' egegkok, keñe chá'a axta'a malwátessemek sekmeneykmasso, tén han sélmaxnagko m'a Dios apteme nak sénnaqtésso.

⁹ Atnehek chá'a wának Dios, apteme nak semasma: “¿Yaqsa ektéma megkaxeyenma nak apwáxok ko'o? ¿Yaqsa katnehek ko'o kayaqhapmakha ewáxok, eñama setwáseykegkoho m'a sélenmexma nak?”

¹⁰ Weykmok élmásse exchakkok, eñama sexéneykha ekmaso m'a sélenmexma nak, yókxoho ekhem kélteme sélmaxneyeykha s'e: ¿Háxko aphakxa Dios apagkok?

¹¹ ¿Yaqsa katnehek ko'o kayaqhapwomhok ewáxok? ¿Yaqsa katnehek ko'o katneykha ewáxok? Élhaxanmeyk eyke aqsa m'a Dios, cham'a peya nak ko'o alenxanmohok sélpeykessamo. ¡Cha'a apteme ko'o Dios ahagkok ma'a, tén han Sewagkasso teyp!