Salmos 41 - Biblia Enxet

Énxet apháxamap apkelmaxnagko

¹ Apkeleñémo énxet appasmo nak chá'a m'a meyke nak aqsok apagkok; Wesse' egegkok sa' emallahanchesek ma'a ekwa'a sa' ekhem ekmaso.

² Wesse' egegkok sa' etaqmelchesek, egkések sa' apyennaqte, tén han ekpayheykekxa apwáxok neyseksa apha m'a xapop apagkok nak, megyohok sa' emok etwasagkohok ma'a apkelenmexma nak.

³ Wesse' egegkok sa' egkések apwasqapma apyetna enxoho néten apyetnamakxa eñegkohok ekmáske, ¡egkeyásekxak sa' makham apyennaqte!

⁴ Axta ektáhak ko'o s'e: “Wesse', yepyósho hélano'; hetaqmelchessem, may'assáxma eykhe ko'o nápaqto' xép.”

⁵ Aqsok ekmaso aqsa apkeltémok heyáhapwak ma'a sélenmexma nak, etnehek chá'a apkelpeywa s'e: “¿Yaqsa sa' kexa ekhem yetsapok, tén han kamassegwók apxénamap?”

⁶ Ey'aweykteyk agkok chá'a, melpékessók chá'a apkelpaqmeyesma; enegkenek chá'a apkelwáxok ma'a setnamakxa ekmaso, keñe apkelántepa enxoho chá'a ámay, hexének chá'a ekmaso.

⁷ Épetchekxak chá'a pók ma'a setaqnagko nak chá'a ko'o, keñe hexének chá'a; yának chá'a añeykegkohok ko'o eñama seksexnánémaxche'.

⁸ Etnehek chá'a elpaqmétek se'e: “Kelyekhama' keñamak ekmésso apháxamap; apyetneyk kaxwo', mexnágwomek néten.”

⁹ Weykmók sénmexeykekxo m'a sekxegexma seyásekhayo nak, magwéssama axta chá'a aqsok ahagkok, sektómo axta chá'a xamók sekto.

¹⁰ Wesse', yepyósho hélano'; hexneyásekxa néten, keñe sa' atnéssesek ko'o ekpayhawo nak atnéssesek séllegassáseykegkoho m'a.

¹¹ Sa' ay'ásegwók ko'o ekleklamo apwáxok ko'o exchep ektáha enxoho s'e: cham'a melessawásencha'a enxoho hetnessásekxak kóneg ma'a sélenmexma.

¹² Ko'o eyke hepásem, eñama eyáxñeyo sektémakxa, hexnés chá'a m'a aphakxa nak.

¹³ ¡Apcheymákpoho sa' chá'a kólteméssesek Wesse' egegkok, Dios apagkok nak Israel, kaxwo' nak, tén han megkatnégwayam néxa! ¡Katnahagkok sa'!