Salmos 40 - Biblia Enxet

Dios ahagkok, kalkohok chá'a ko'o ewáxok alának ma'a apmopmenyého nak xép

¹ Élhaxanmeyk axta aqsa ko'o m'a Wesse' egegkok, ey'eykekteyk axta yaqwayam yeyxhok sekwóneykha séltémo hepasmok;

² elekwákxeyk axta m'a máxek nétsapmakxa nak, etekkessek axta sekweywegko eykhe m'a yáma yelpa' nak. Énegkessákxeyk axta néten meteymog; etaqmelchessessekmek axta sekxega.

³ Epekkenchessek axta ahátog negmeneykmasso axnagkok, negmeneykmasso nélpeykessamo nak Dios egagkok. Yeyk sa' apxámokma énxet apkelwet'a enxoho, keñe sa' etnehek melya'ásseyam Wesse' egegkok.

⁴ ¡Apkeleñémo énxet apteme nak mey'ásseyam Wesse' egegkok, mepaxqeykha nak énxet'ák éleymáxkoho apkelwáxok, tén han melpeykessamo nak chá'a aqsok kéláyókxa élmowancha'a amya'a nak!

⁵ Wesse', Dios ahagkok, xámok agko' nak la'a exchep senlánésso aqsok éltaqmela, xámok agko' aqsok senlánésso ekxeyenma apwáxok negko'o. ¡Méko aphawo exchep! Émenyeyk eykhe ko'o axének xa, tén han alyetsetek, mowanchek eyke, xámok agko'.

⁶ Mopmenyeyk xép ma'a kélnaqtósso ektekyawa nak, tén han ma'a aqsok kélcheneykekxa ekyexna kélmésso naqsa nak chá'a; meltémók han kólsakxések ma'a aqsok kélwatno nak, tén han ma'a aqsok kélmésso naqsa ekmasséssamo nak magya'assáxma. Enegkenchessegkek xép eheyk'ák yaqwayam aña'.

⁷ Cháxa keñamak sektáha nak seyáneya exchep se'e: Ekheyk ko'o s'e, hágkek eknaqtáxésamaxche weykcha'áhak seyánémaxchexa nak ko'o alána'.

⁸ Dios ahagkok, kalkohok chá'a ko'o ewáxok alának ma'a apmopmenyého nak xép; ¡ekpekkenmeyk ewáxok ma'a segánamakxa apagkok nak!

⁹ Élya'assásegweykmek axta ko'o aqsok ekpéwomo nepyeseksa m'a énxet'ák apagkok apxámokma nak. ¡Wesse', apya'ásegkok xép mawanmeyha aqsa!

¹⁰ Mawanmagkok aqsa ko'o, eklegassegkek ma'a ektémakxa nak xép ekpéwomo aptémakxa; ekxeyenmeyk ma'a ektémakxa nak xép mehenyenyaweykha, tén han segwagkasso teyp. Makpóssók xama enxoho ektémakxa segásekhayo, tén han ekmámnaqsoho mehegyenyaweykha, nápaqta'awók ma'a énxet'ák apagkok apxámokma nak.

¹¹ Wesse', ¡ná elwatés aqsa seyápeykha! ¡Hemyók sa' chá'a ko'o m'a ektémakxa nak segásekhayo, tén han meheyenyaweykha!

¹² Xámok agko' seyáhapwe aqsok ekmaso, mowanchek axének ekwánxa. Eyápeykekxeyk ma'a sektémakxa ekmaso ahagko' nak; ¡massegkek sekwetéxma! Xámok agko' may'assáxma, yeykhágweykmók ma'a ekweykenxal'a ekxámokma éwa', ekyelqamáxcheyk nahan.

¹³ Wesse', ¡hewagkasseta teyp! Wesse', ¡hepásegwata heykxa'!

¹⁴ ¡Elmegqeyk sa' kéltemessásekxo enxoho mékoho m'a apmáheyo nak chá'a heyaqhek! ¡Elmegqeyk sa' yenyahagkok ma'a apmáheyo nak chá'a hetnéssessamhok exma ekmaso!

¹⁵ ¡Elyexanmok sa' apkelmegqakto m'a énxet'ák sésmésso nak chá'a ko'o!

¹⁶ Keñe sa' kalpayhekxak apkelwáxok apyókxoho m'a ektáha nak chá'a apkelye'eykekxa exchep. Sa' etnehek chá'a elpaqmétek apyókxoho apkelmopmenyého nak chá'a negwagkásamáxche teyp apagkok: “¡Apwányam apagko' Wesse' egegkok!”

¹⁷ Wesse', ná hélwánaqma aqsa ko'o sektáha nak sekmayósa, tén han eklegeykegkoho ewáxok. Xép apteme sepasmo, tén han sewagkasso teyp, ¡Hepásegwata heykxa', Dios ahagkok!