Salmos 4 - Biblia Enxet

Nélmaxnagko amonye' nenteyenma

¹ Dios, apteme nak chá'a ko'o semasma, ¡heyátegmowák sa' ko'o sekwóneyncha'a enxoho! Xeyep axta setaqmelchessáseykekxa ewáxok, cham'a ekwa'a axta eklegeykegkoho ewáxok, ¡Yepyósho ko'o hélano', yeyxho sélmaxnagko!

² Kéxegke kélanagko nak chá'a kóltáhak énxet ekha kéláyo, ¿háxko sa' ekwánxa ekhem kammok kélenmexeykha m'a ektémakxa nak ko'o meyke sektémakxa? ¿háxko sa' ekwánxa ekhem kammok kélmámenyého m'a aqsok ekteme nak mékoho, tén han kélchetamso m'a aqsok megkamámnaqsoho nak?

³ Kólya'asagkoho sa' kéxegke, wánxa aqsa apmenyeyk Wesse' egegkok ma'a énxet apteme nak chá'a meyenyaweykha; kólya'asagkoho sa' kéxegke, heyeyxhok chá'a ko'o Wesse' egegkok ma'a sekwóneyncha'a enxoho chá'a.

⁴ ¡Kóláwho sa', kólwátésák kélláneyak megkólya'assáxma! Kólhák kaxwo', meyke kélpaqméteykha, kólxénekxa kélagko' ma'a ektémakxa nak élchetamso kélwáxok;

⁵ Kólmés kélmésso naqsa aqsok Dios meyke kéltemessáseykha naqsa, nágkólya'ássem ma'a Wesse' egegkok.

⁶ Apxámok énxet apteme chá'a apkelpeywa s'e: “¿Yaqsa negko'o hegwetaksek ma'a ektaqmalma nak negheykha?” Wesse', ¡henlano negko'o yetlo ektaqmeleykha apwáxok!

⁷ Egkéssegkek xép ekyawe agko' ekpayheykekxa ewáxok, máxa m'a énxet apxámokma nak hótáhap apagkok, tén han ma'a ekxámokma nak anmen yámet égmenek apagkok.

⁸ Wesse', eytek chá'a ko'o meyke sélya'ásekhaxma, ñohok nahan chá'a atyenek, hakte xép keñamak segkésso meyke ektáhakxa ewáxok.