Salmos 37 - Biblia Enxet

Magya'ásseyam Wesse' egegkok

¹ Nágkallókas aqsa apwáxok elanok ma'a énxet'ák élmaso nak apkeltémakxa, nágkayásekkes aqsa apwáxok apkeltémakxa m'a énxet'ák apkeláneykegkoho nak aqsok ekmaso,

² hakte kaxwók sa' emassegwók, máxa sa' etnahagkok ma'a pa'at élyamayél'a; ¡máxa sa' etnahagkok ma'a aqsok kélcheneykekxal'a!

³ Ná ey'ássem Wesse' egegkok, elána aqsok ektaqmela, ná eyensem apyetleykha neyseksa apha xapop apagkok.

⁴ Yásekhoho chá'a Wesse' egegkok, yetlo apchápeykha, keñe sa' egkések chá'a m'a ekmámenyého agko' nak apwáxok.

⁵ Egkés Wesse' egegkok ma'a aptémakxa nak; ná ey'ássem ma'a, keñe sa' epasmok.

⁶ Yának sa' kataxchek ma'a aptémakxa ekpéwomo nak xép, máxa sa' ekhem éltátchessól'a yetseksók ekhem katnehek ma'a aptémakxa eyáxñeyo.

⁷ Ewanmeyha sa' aqsa nápaqto' Wesse' egegkok, eleyx aqsa epasmok meyke appekhésamap. Nágkalókas apwáxok étak ma'a énxet'ák ektaqmalma nak apheykha, ekteyapma nak chá'a aqsok ekmaso yaqwayam elanagkok.

⁸ Nágyoho chá'a kalwok apwáxok, elwatés aplo; ná elaw chá'a, hakte kayánchessamhok chá'a ekmaso aqsok xa.

⁹ Kólántekkesek sa' apchókxa xa énxet'ák élmasagcha'a nak apkeltémakxa, keñe sa' ma'a énxet'ák melya'ásseyam nak Wesse' egegkok, elmok etnehek apagkok.

¹⁰ Kaxwók sa' emassegwók ma'a énxet'ák élmasagcha'a nak apkeltémakxa; elchetmok sa' eykhe, melwetekxeyk sa' eyke.

¹¹ Sa' eyke elxewekxak xapop ma'a megkaleymáxkoho nak apkelwáxok, awanhók agko' sa' katnehek meyke ektáhakxa apheykha.

¹² Elánekxak chá'a aptamhágkaxa emáwhok etnéssessamhok exma ekmaso élmasagcha'a nak apkeltémakxa m'a énxet meyke nak apkeltémakxa, megyeksek chá'a elano', yetlo éllo apkelwáxok.

¹³ Yesmaksek eyke aqsa chá'a Wesse' egegkok, hakte apya'ásegkok kaxwók sa' elmassegwók ma'a élmasagcha'a nak apkeltémakxa.

¹⁴ Elhaxyawaksek chá'a sawo élwenaqte apagkok ma'a énxet'ák élmasagcha'a nak apkeltémakxa, eleykesek chá'a axát'ák yágke apagkok yaqwayam elnápok ma'a énxet'ák apkelmopyóseka nak, tén han ma'a meyke nak aqsok apagkok, tén han ma'a ektaqmalma nak apkeltémakxa.

¹⁵ Sawo élwenaqte apagkok apagko' sa' eyke kólyetxeykxak chá'a, keñe sa' yágke apagkok katnekxak nekha'a étkók.

¹⁶ Ántawók eykhe katnehek aqsok apagkok ma'a énxet ektaqmalma nak aptémakxa, tásek eyke, kaxnók ma'a ektémakxa nak ekxámokma aqsok apagkok ma'a énxet'ák élmasagcha'a nak apkeltémakxa.

¹⁷ Emasséssesek sa' apkelyennaqte Wesse' egegkok ma'a énxet'ák élmaso nak apkeltémakxa, epasmok sa' eyke chá'a m'a éltaqmalma nak apkeltémakxa.

¹⁸ Eltaqmelcheshok chá'a Wesse' egegkok ma'a ektaqmalma nak apkeltémakxa, megkamassegwomek sa' chá'a m'a xapop apagkok apkelxaweykekxa nak.

¹⁹ Wa'ak sa' agkok ekmaso apheykha, ektepa enxoho meyk segaqhe, mellegagkók sa', hakte yetneyk sa' chá'a katnehek aptéyak.

²⁰ Máxa pa'at apák sa' etnahagkok elmétek ma'a élmasagcha'a nak apkeltémakxa; máxa éten sa' etnehek elmassegwók ma'a apkelenmexma nak Wesse' egegkok.

²¹ Yának chá'a kólmássesha aqsok ma'a élmasagcha'a nak apkeltémakxa, keñe meyaqmagkásekxeyk chá'a, apyósek eyke elanok pók ma'a énxet ektaqmalma nak aptémakxa, memyewek nahan aqsok apagkok.

²² Elxewekxak sa' xapop ma'a ektaqmalma nak chá'a apkelxéneykha Wesse' egegkok, keñe sa' ma'a ekmaso nak chá'a apkelxéneykha, kólmasséssók sa'.

²³ Wesse' egegkok eyke apkeláneseyak chá'a ektémakxa apxega énxet, emyók chá'a m'a ekleklamókxa nak apwáxok;

²⁴ apyaqnenchek agkok chá'a, yempekxak chá'a néten, hakte Wesse' egegkok apméyak ma'a apmek.

²⁵ Étkok axta ko'o, sekwányamók eyke kaxwók ektáhak, makke ateyk makham meyke ekpasmo m'a énxet meyke nak aptémakxa, mateyk nahan elmaxneyha aqsok énxet'ák ma'a apketchek.

²⁶ Yókxoho ekhem chá'a apmopyósa elanok pók, tén han apmassáseykha chá'a aqsok apagkok; Dios han apkelmésso m'a apketchek, eñama ektaqmeleykha apwáxok apkelányo.

²⁷ Étnakhés nentémakxa ekmaso, elána' aqsok ektaqmela, tén sa' kaxek chá'a aphamakxa.

²⁸ Hakte yásekhohok chá'a Wesse' egegkok ma'a nentémakxa ekpéwomo nak, meyenyewek han chá'a m'a ektáha nak meyenseyam apyetleykha; emasséssamhok eyke chá'a m'a élmasagcha'a nak apkeltémakxa, meyke aptawán'ák neptámen chá'a etnéssesek.

²⁹ Énxet'ák meyke apkeltémakxa sa' elxawagkok ma'a xapop, exmakha sa' chá'a meyke néxa m'a.

³⁰ Yetlo apkelya'áseyak chá'a elpaqmétek ma'a énxet'ák éltaqmalma nak apkeltémakxa; yetlo ekmámnaqso' han chá'a etnehek apkelpeywa m'a.

³¹ Enegkenek han chá'a apkelwáxok ma'a segánamakxa apagkok nak Dios apagkok; ¡megkasógwomek chá'a apkelxega!

³² Elanha chá'a énxet ekmaso nak aptémakxa m'a énxet ektaqmalma nak aptémakxa, yaqwayam yaqhek;

³³ megyohok eyke emok ma'a Wesse' egegkok, megyohok han exénakpok apsexnánémap.

³⁴ Nágkólya'ássem kéxegke Wesse' egegkok, kólyahakxoho nahan, hakte sa' etnéssesek ekha kéláyo kéxegke m'a, tén han egkések yaqwayam kóltéhek kélagkok apchókxa. ¡Kéxegke kélagko' sa' han kólwetagkohok kólmasséssók ma'a élmasagcha'a nak apkeltémakxa!

³⁵ Ekwet'ak ko'o énxet ekmaso nak aptémakxa eyeymáxkoho agko' apwáxok, apsawheykekxoho yókxexma ektémól'a yámet ekyawe ekxámokmal'a áwa';

³⁶ keñe sekmeyákxo makham ma'a, ekmassa sekwet'a, étamchek axta eykhe, axta eyke óteyákxa'.

³⁷ Elano énxet meyke nak aptémakxa, tén han eyáxñeyo nak aptémakxa: yetneyk aptawán'ák neptámen ma'a énxet meyke nak ektáhakxa apha.

³⁸ Kólmasséssók sa' eyke m'a apkenmexeykekxa nak Wesse' egegkok segánamakxa apagkok; kólmasséssók sa' apyókxoho aptawán'ák neptámen ma'a élmasagcha'a nak apkeltémakxa.

³⁹ Wesse' egegkok keñamak apkelwayam teyp ma'a énxet'ák éltaqmalma nak apkeltémakxa, chá'a apkelyexánegweykekxexa chá'a ekwa'a enxoho ekmaso apheykha.

⁴⁰ Epasmok chá'a Wesse' egegkok elmallahanchesek. Elegketchesek chá'a m'a élmasagcha'a nak apkeltémakxa, tén han elwagkasek chá'a teyp, hakte apkelye'eykekxeyk chá'a aptegyeykencha'a élmasma m'a.