Salmos 36 - Biblia Enxet

Aptémakxa ekmaso énxet

¹ Kapaqhetchesek chá'a kañók agko' apwáxok mey'assáxma m'a énxet ekmaso nak aptémakxa. Megkaxének chá'a apwáxok yeyk ma'a Dios.

² Yának chá'a kapayhawok kataqmelek apxénamap, mey'asagkehek chá'a kataxchek ma'a aptémakxa ekmaso.

³ Asagkók chá'a katnehek appeywa, apmopwána amya'a han, massegkek apya'áseyak exma, apkelwátessegkek apkelane aqsok ektaqmela.

⁴ Apyetneyk agkok chá'a néten apyetnamakxa, kaxének chá'a apwáxok elának aqsok ekmaso, yennaqtegkek aptémakxa ekmaso, mopmenyeyk elwataksek apkelane aqsok ekmaso.

⁵ Wesse', weykmók eyke exchep segásekhayo m'a néten, weykmók ektémakxa mehenyenyaweykha m'a yaphope ekyápaqmate nak.

⁶ Máxa eyke meteymog élyawe élekhahéyak la'a m'a aptémakxa ekpéwomo; máxa eyke wátsam ekwányam ekmattawóneg la'a m'a apchánamakxa nak antéhek. Wesse', xép apkeláneykha énxet'ák, tén han aqsok nawha'ák.

⁷ Oh Dios, ¡tásók agko' nak la'a exchep ektémakxa segásekhayo! ¡Apkelyexánegweykekxeyk chá'a exchep aphakxa m'a énxet'ák, cham'a kóneg apxempenák nak!

⁸ Etawagkok chá'a aptéyak éltaqmela, ekhéyak nak ekxámokma m'a apxagkok; elagkok chá'a exchep yegmen ekmátsa eñama nak ma'a wátsam apagkok ektaqmalma,

⁹ hakte xép apteme ekteyapmakxa negyennaqte, élseyéxma apagkok keñamak negmowána agwetak negko'o m'a élseyéxma nak.

¹⁰ Egkés chá'a apchásekhayo, tén han aptémakxa ekpéwomo m'a ektáha nak chá'a apyekpelchémo exchep, cham'a énxet'ák meyke nak apkeltémakxa.

¹¹ Nágyoho hetnessásekxak kóneg ma'a apkeleymákpoho nak, nágyoho heyaqmaksek énxet'ák élmasagcha'a nak apkeltémakxa.

¹² ¡Kóllano ektáhakxa appalleyam ma'a énxet'ák élmasagcha'a nak apkeltémakxa! ¡Appallakme', menaqxétekhagkokxeyk chá'a!