Salmos 35 - Biblia Enxet

Nélmaxnagko néltémo hempasmok Wesse' egegkok

¹ Wesse', elenmex énxet'ák sénmexeykha nak chá'a ko'o; ektamák ma'a sektámeyam nak chá'a ko'o.

² Emekxa apcháhakkásamap, tén han apkelmeykha hepásegwata';

³ emekxa sawhéwa apagkok, elnapap ma'a énxet'ák seyaqmáseykha nak chá'a ko'o; ¡héltennés peya hewagkasek teyp!

⁴ Yenyahagkok sa' apkelmegqakto m'a apmáheyo nak chá'a heyaqhek, yenyahagkok sa' apkelmegqakto m'a apmáheyo nak chá'a hetnéssessamhóxma ekmaso;

⁵ ¡kalsók sa' éxchahayam ektémól'a pa'at apák, apkexpánchesso m'a Wesse' egegkok apchásenneykha!

⁶ ¡Kayáqtések sa' exma ámay apagkok, keláxña'ak sa' nahan katnehek, apmenxena enxoho m'a Wesse' egegkok apchásenneykha!

⁷ Meykexho sektémakxa epekkenchessók emonye' kelhanma; meykexho sektémakxa emétegkessók emonye' máxek, yaqwayam enxoho ko'o atyamok ma'a kañe'.

⁸ ¡Katlakkasek sa' eyke káhapwaták kélmassésseyam. ¡Kalmekxohok sa' agkok ma'a apkelhanma! ¡Káhapwaták sa' aqsok ekmaso!

⁹ Keñe sa' hepeykessásekxak ewáxok Wesse' egegkok, sewagkasa enxoho teyp.

¹⁰ Sa' atnehek apaqmétek ekweykmoho kañók agko' ewáxok se'e: “Wesse', méko ekhawo exchep. Apkelwagkassegkek xép teyp énxet'ák apkelmopyóseka apkelmoma m'a énxet'ák apkelyennaqte nak, apkelwagkassegkek xép teyp énxet'ák meyke nak aqsok apagkok apkelmoma m'a apnaqtawáseykegkoho nak chá'a.”

¹¹ Apkelmopwancha'a amya'a aptamheykegkok sexéneykencha'a m'a énxet'ák élmasagcha'a nak apkeltémakxa. Hélmaxneyha chá'a m'a aqsok may'ásegkaxa nak ko'o.

¹² Ekmaso chá'a apyaqmagkáseykekxak sekteméssessamakxa ektaqmela, cháxa eyaqha agko' nak ko'o ewáxok xa;

¹³ apkelháxeykpek agkok chá'a m'a, ko'o chá'a añegkohok ektamhágkaxa enxoho m'a, ataxnekxak chá'a m'a apáwa sẽlwáxaqxo nak, matwehek han chá'a sekto, megkamassegwomek chá'a élmaxnagko ewáxok.

¹⁴ Kayaqhapmakha chá'a ewáxok aweynchamha, hélapwók nahan chá'a, máxa atnéssesek ma'a ektémól'a hélapwagkasek katsapok méme, essenhan ma'a sekxegexma ahagko' la'a, essenhan ma'a eyáxeg ahagko' nak.

¹⁵ Keñe axta sekteyekmo, apsawhékpók axta sésmésa, etwásegkok axta meyke néxa, máxa axta aptamhágkok ma'a énxet'ák mehegya'áseyak la'a, tén han mehegweteyál'a,

¹⁶ Etwásegkok axta, ésméssek han chá'a, kellókek axta chá'a nápaqta'a sélano.

¹⁷ Wesse', ¿háxko sa' ekwánxa ekhem hélanha aqsa ko'o? ¡Hewagkas ko'o teyp, neyseksa ekmáheyo heyaqhek se'e yámakméwa élyexwéweykencha'a nak!

¹⁸ Tén sa' agkések ko'o ekxeyenma ewáxok xép, nápaqta'awók ma'a énxet'ák apagkok apxámokma nak; ¡alteméssesek sa' apcheymákpoho, nápaqta'awók ma'a énxet'ák apxámokma nak!

¹⁹ Nágyoho kalpayhekxak apkelwáxok hélanok ma'a sélenmexma nak ko'o; nágyoho kalátsaha nápaqta'a hey'ássók ma'a setaqnagko nak chá'a meykexho sektáhakxa.

²⁰ Mopmenyeyk elwátésagkok apkello m'a, apmopwancha'a amya'a aqsa chá'a etnahagkok elxénagkok ma'a énxet'ák meyke nak apkello negókxa';

²¹ kalyenneyha chá'a apkelpeywa hénmexmakha, etnehek apkelpeywa s'e: “¡Kóllano ektáhakxa nak negweté!”

²² ¡Apweteyak xeyep xa, Wesse'! ¡Ná ewanma aqsa elanha! ¡Ná heyenyow ko'o!

²³ Etnemekxa néten, Dios Wesse' ahagkok, hepásegwata', ¡exatakha'! Hexén ko'o meyke sektémakxa.

²⁴ Wesse' Dios ahagkok, hetnésses ko'o ekhawo aptémakxa nak xép appéwomo. ¡Nágyoho wasmésaxche'!

²⁵ Nágyoho etnehek apkelpeywa tén han katnehek apkelwáxok se'e: “¡Cháxa negmámenyého nak negko'o katnehek xa! ¡Negmasséssekmek kaxwo'!”

²⁶ Yána elmegqágwomhok apagko' ma'a élpayheykxo axta apkelwáxok seyáhapwa'a ko'o aqsok ekmaso; yána elmegqáwhok apagko' ma'a apkene axta hetnessásekxak ko'o kóneg.

²⁷ Eyke yána kalpayhekxak apkelwáxok tén han elwehesha elátsaha m'a apkeltémo axta ko'o axénaxchek meyke sektémakxa; sa' etnehek chá'a elpaqmétek se'e: “¡Apwányam apagko' Wesse' egegkok, kalkohok chá'a apwáxok kataqmelhok apha m'a apkeláneykha nak!”

²⁸ Axének sa' chá'a ko'o exchep apteme ekpéwomo aptémakxa; ¡ekyókxoho ekhem sa' chá'a alteméssesek apcheymákpoho!