Salmos 31 - Biblia Enxet

Magya'ásseyam agko' Wesse' egegkok

¹ Wesse', ekya'awekteyk ko'o exchep séltamho hetaqmelchesek; ¡nágyoho ko'o amegqeyk xama enxoho! ¡Hewagkas teyp, hakte péwók xép aptémakxa!

² Heyeyxho ko'o, ¡epekhésa, hewagkasek teyp! Etne exchep semasma apyennaqte, ¡etne exchep tegma apyennaqte sekyexanmomakxa, tén han sewagkasso teyp!

³ ¡Xép apteme semasma apyennaqte, tén han tegma apyennaqte ahagkok! ¡Héntamha chá'a ko'o, hemyow nahan chá'a; ¡elána' eñama apmasma apwesey!

⁴ ¡Nágyoho hemok ma'a kelhanma sélpekenchessama nak emonye', hakte xép apteme setaqmelchesso!

⁵ Éltamhók ko'o emok xép ehagák; ¡hemekxa Wesse', Dios apteme nak apmámnaqsoho!

⁶ Ataqnawhok ko'o m'a apkelpeykessamo nak kéleykmássesso mékoho. May'ásseykmok ko'o m'a Wesse' egegkok.

⁷ Kapayhekxak chá'a ewáxok eñama seyásekhayo, wátsaha chá'a, hakte apwetayak xép ektémakxa nak seklegeykegkoho, apya'ásegkok ma'a ektémakxa nak ekyaqhápeykha ewáxok;

⁸ meltémók hemok ma'a sélenmexma nak; ¡etnegkesseykmek ma'a ekyawakxa nak exma'!

⁹ Wesse', kapyósho ko'o hélano', hakte ekheyk ko'o eyesagkexa'. Kelyélaqtéssegkek ko'o ahaqta'ák seklegeykegkoho, tén han émpehek, ¡ekweykmoho m'a kañók agko' nak ewáxok!

¹⁰ ¡Esawhéssegkek ko'o sekyennaqte m'a seklegeykegkoho, yaqwátéssegkek apyeyam sekha sélapwayam! Sawhomakyek sekyennaqte m'a ekyaqhápeykha ewáxok; ¡yélaqtéssegkek émpehek!

¹¹ Ellektegmaha chá'a ko'o hélanok ma'a sélenmexma, hey'ássók chá'a m'a apheykha nak ketók exagkok, heyeyk chá'a ko'o m'a sélweteykxa nak. ¡Yenyahagkok chá'a ektáha nak chá'a sete m'a ámay nak!

¹² Massegkek ko'o ekxeyenma kélwáxok, máxa temék ma'a sétsapma enxoho. Máxa ko'o m'a egheykok kélpaxqáteykekxal'a, élánamáxche nak yelpa'.

¹³ Añohok chá'a ko'o elyexchesakpok énxet'ák etnehek hexének se'e: “Sawheykekxók élmeneymáxche ekyókxoho yókxexma.” Apyepetchákxeyk pók apkelánégkokxo yaqwánxa hetnéssesek; ¡apkelánégkokxeyk aptamhágkaxa apmako heyaqhek!

¹⁴ Makke ay'ásseykmok ko'o exchep Wesse'; atnehek chá'a sekpeywa s'e: “¡Xép apteme Dios ahagkok!”

¹⁵ Xép apmeykha sekyennaqte, ¡hewagkas teyp nepyeseksa sélenmexma señassáseykegkoho nak chá'a!

¹⁶ Hélano yetlo ektaqmeleykha apwáxok, ko'o sektáha nak xép apkeláneykha, hewagkas teyp eñama seyásekhayo.

¹⁷ Wesse', ekwóneyha ko'o exchep; ¡nágyoho ko'o amegqáwhok ahagko'! ¡Eyke elmegqaksoho apagko' ma'a élmasagcha'a nak apkeltémakxa; elwanmeyásekxoho apagko' elya'aksek ma'a takhaxpop nak!

¹⁸ Elwanmeyásekxa m'a apkelmopwancha'a amya'a nak, apkelasmésso nak chá'a yetlo apkelwanyeykha m'a énxet'ák meyke nak apkeltémakxa, tén han apkeltaqnagko nak chá'a.

¹⁹ ¡Awanhek xép ektaqmeleykha apwáxok elanok ma'a ektáha nak chá'a apcháyo exchep! Apteméssessama nak máxa aqsok ekmomnáwa aptaqmelchessama apkelmeyáseykegkoho nak chá'a nápaqta'awók énxet'ák ma'a aptáha nak chá'a exchep mey'ásseyam.

²⁰ Aphakxa chá'a exnések megyohok etnéssessamhok exma m'a énxet'ák élmasagcha'a nak apkeltémakxa; kóneg aphakxa chá'a exnések etaqmelchesek yeksek apkelya'ásseyam ma'a apkelenmexma nak.

²¹ Kólteméssesek sa' chá'a apcheymákpoho Wesse' egegkok, hakte aqsok ektaqmela axta éláneyásak yetlo seyásekhayo eyesagko axta setnahakxa', sekwakhéxko axta.

²² Énagkamchek axta ko'o héltekkessók ma'a aphakxa nak, cham'a sélmenaka axta; xama axta sélmaxneya séltamho hepasmok, apleg'awók axta exchep sekwóneykha.

²³ Kólásekhoho chá'a Wesse' egegkok, kélyókxoho megkólyenseyam nak chá'a kélyetleykha. Eltaqmelchesek chá'a Wesse' egegkok ma'a melya'ásseyam nak chá'a ekmámnaqsoho, eyeykhássamhok eyke chá'a apkellegassáseykegkoho m'a éleymáxkoho nak apkelwáxok.

²⁴ Kólwasqápekxoho, kólyennaqteyásekxoho kélwáxok kélyókxoho megkólya'ásseyam nak Wesse' egegkok.