Salmos 25 - Biblia Enxet

Nélmaxnagko néltémo hempékessesagkok Dios

¹ Wesse', xeyep ko'o exchep élmaxneyk;

² Dios ahagkok, may'ásseykmok ko'o exchep: nágyoho ko'o amegqáwhok ahagko', nágyoho hésmaksek sélenmexma.

³ ¡Nágyoho elmegqeyk xama enxoho m'a ektáha nak xép apcháyo! ¡Eyke yána elmegqeyk ektáha nak xép apkenmexeykekxa meykexho apteméssessamakxa!

⁴ Wesse', hexekmós ko'o exchep ámay apagkok; héntemekxa m'a ámay apagkok nak.

⁵ Hepékessesák, hélxekmós ma'a ektáha nak ekmámnaqsoho, hakte xép apteme Dios ahagkok, tén han Sewagkasso Teyp. ¡May'ásseykmok chá'a ko'o exchep yókxoho ekhem!

⁶ Wesse', kaxén apwáxok segásekhayo nak, tén han apmopyósa henlano', senxekmóssama nak chá'a eyeynamo m'a nanók agko' axta,

⁷ nágkaxén apwáxok ma'a sektémakxa may'assáxma, tén han ma'a aqsok ekmaso sélane sektémakxa axta wokma'ák. Wesse', kaxén apwáxok ko'o, eñama m'a segásekhayo ekyawe nak, tén han ma'a ektaqmeleykha nak apwáxok henlano'.

⁸ Tásek aptémakxa m'a Wesse' egegkok, péwók nahan, elxekmósek chá'a m'a énxet'ák melya'assáxma nak,

⁹ enaqlakxak chá'a ámay apagkok ma'a énxet'ák megkaleymáxkoho nak apkelwáxok; ¡elxekmósek chá'a m'a nentémakxa ekpéwomo nak!

¹⁰ Enaqlakxak chá'a yetlo apkelásekhayo, tén han melyenyaweykha m'a ektáha nak chá'a apkeláneyak ekhémo mók nélpaqhetchásamáxkoho apagkok nak, tén han ma'a apkeltémókxa nak antéhek.

¹¹ Wesse', awanhek ko'o may'assáxma, eyke heyásekhekxoho sa', elána sa' eñama apmasma apwesey.

¹² Énxet apcháyo nak chá'a Wesse' egegkok, exekmósek chá'a ámay eyeyméxko nak chá'a étlók;

¹³ egkések chá'a ektaqmalma apha, elmeyásekxak chá'a aptawán'ák neptámen ma'a xapop.

¹⁴ Apxegexma Wesse' egegkok ma'a énxet aptáha nak chá'a apcháyo, elxekmósek chá'a m'a ekhémo mók nélpaqhetchásamáxkoho apagkok nak.

¹⁵ Wánxa aqsa chá'a wanmexhok aphakxa m'a Wesse' egegkok, hakte ewagkassegkek teyp neyseksa ekyókxoho aqsok ekmaso.

¹⁶ Wesse', epeyncháp hana hélano', kapyósho ko'o hélano', hakte exakkók ko'o, yentexek han sekha.

¹⁷ Yágweykmók aqsa eklegeykegkoho ewáxok; hemasséssek ko'o ektémakxa nak ekyentaxno ewáxok.

¹⁸ Elano ektémakxa nak ko'o seklegeykegkoho, tén han sekyampayo, ná eyaqmagkásekxa ektémakxa may'assáxma.

¹⁹ Elano, apxámok apagko' ko'o sélenmexma, apmáheyo nak chá'a ko'o heyaqhek setaqnagkamo apagko' nak chá'a.

²⁰ ¡Hetaqmelches ko'o, nágyoho watsapok! ¡Nágyoho ko'o amegqáwhok ahagko', hakte ekye'eykekteyk ko'o exchep séltémo hetaqmelchesek!

²¹ Sektémakxa ektaqmela sa' hetaqmelchesek, tén han ekpéwomo sektémakxa, hakte may'ásseykmok ko'o exchep.

²² ¡Dios ahagkok, elmallahanches énxet'ák Israel ekyókxoho m'a élyentaxnéssessamo nak chá'a apkelwáxok!