Salmos 24 - Biblia Enxet

Wesse' apwányam apteme apcheymákpoho

¹ Wesse' egegkok apagkok keso nélwanmeygkaxa, tén han ma'a ekyókxoho aqsok ekhéyak nak awáxok, tén han ma'a ekyókxoho élleykha nak.

² Hakte Wesse' egegkok axta appekkenma awhak xapop, tén han appekkenma m'a néten nak wátsam élyawe tén han ma'a wátsam.

³ ¿Yaqsa awanchek kántek ma'a Wesse' egegkok egkexe apagkok nak? ¿Yaqsa awanchek katnegwók ma'a kañe' tegma appagkanamap apagkok aptaqmalma nak?

⁴ Wánxa m'a megkalane nak aqsok ekmaso, eyáxñeyo nak awáxok, meyke nak megkay'assáxma, megkalpeykessamo nak kéleykmássesso, megkaxeyenma nak kalának aqsok ekmowána amya'a.

⁵ Egkések sa' ektaqmalma apha m'a Dios Wesse' apagkok apwagkasso nak teyp, exének sa' apteme ekpéwomo aptémakxa.

⁶ Cháxa eyéméxko nak etnahagkok ma'a apketamso nak chá'a Wesse' egegkok, apkelye'eykekxa nak chá'a m'a Jacob nak Dios apagkok.

⁷ ¡Kólmeykesák nanók atña'ák nak! ¡Kólmeykesagkoho agko' sa', keñe sa' etxek ma'a Wesse' Apwányam apcheymákpoho nak!

⁸ ¿Yaqsa xa Wesse' apwányam apcheymákpoho nak? ¡Neykhe m'a Wesse' egegkok apyennaqte nak, megyeye nak apmonye'! ¡Neykhe m'a Wesse' egegkok apyennaqte nak kempakhakma!

⁹ ¡Kólmeykesák nanók atña'ák nak! ¡Kólmeykesagkoho agko' sa', keñe sa' etxek ma'a Wesse' Apwányam apcheymákpoho nak!

¹⁰ ¿Yaqsa xa Wesse' apwányam apcheymákpoho nak? ¡Neykhe m'a Wesse' egegkok meyke nak ekhémo! ¡Cháxa Wesse' apwányam apcheymákpoho xa!