Salmos 22 - Biblia Enxet

Nélpeykessamo Dios neyseksa ekyentaxno egwáxok

¹ Dios ahagkok, ¿yaqsa ektáha seyenyawa nak?, ¿yaqsa ektáha mehey'aweykto nak hewagkasek teyp?, ¿yaqsa ektáha megyahaxnawo nak sélekxagweykha?

² Dios ahagkok, yókxoho ekhem chá'a exchep sekwóneykha, tén han yókxoho axta'a, makke heyátegmoweykegkok; ¡mallókasseykmok ko'o sekyampe!

³ Appagkanamap akke exchep; Wesse' apwányam xép, apkelpeykessamo nak Israel.

⁴ Axta elya'ásseykmok xép ma'a ẽlyapmeyk nano' axta negko'o; apkelhaxanmeyk axta, tén axta exchep apkelwagkassama teyp;

⁵ apkelmaxnagkamchek axta exchep apkeltémo epasmok, tén axta exchep apkelmallahanchessama ekyentaxno apheykha; axta elya'ásseykmok xép, axta kaqhémok apkelhaxanma.

⁶ Askok ko'o, háwe énxet; ¡hésmaksek chá'a énxet'ák!

⁷ Hey'ássók chá'a ko'o m'a seté nak chá'a, hélántekkessesha chá'a apaxkok, elyeykesha chá'a apqatkok

⁸ etnehek se'e: “Cháxa apcháyo nak chá'a Wesse' egegkok; Wesse' egegkok sa' han ewagkasek teyp. Ewagkasek sa' teyp, hakte apmenyeyk apagko' chá'a.”

⁹ Xép axta eyke apkeltémo atyamok séñama méme awáxok; exnéssegkek axta awáxok.

¹⁰ Ekmésamaxcheyk axta ko'o exchep matyeykemxa axta makham, xép axta Dios ahagkok sekyetnamakxa axta kañe' méme awáxok.

¹¹ Hépetkoho sa' ko'o, hakte ketók ko'o m'a segméssamo nak ekyentaxnamo egwáxok, méko m'a yaqwayam enxoho hepasmok.

¹² Máxa weyke kelennay'awók aptamheykegkok sewakhaya m'a sélenmexma, ektéma nak weyke kelennay'awók éllo m'a Basán;

¹³ máxa méwa éllo aptemék apkelyexweyweykencha'a, elmayhek chá'a, keñe hethánek chá'a.

¹⁴ Ekhawók ko'o m'a yegmen ekyegkenamaxchel'a; kelhaxyawásamáxcheyk exchakkok. Máxa pápa' tamheykekxak ewáxok ekpayheykekxo.

¹⁵ Yamáyak ahátog, máxa ektémól'a yelpa' ekyamaye; yepetcheykekxeyk ahaxkok epaqpehek. ¡Epekkenmeyk náxop, máxa sétsapma etnéssessók!

¹⁶ Máxa semheg aptamheykegkok sewakhaya apxámokma m'a élmasagcha'a nak apkeltémakxa, apkelyensassegkek emék, tén han emagkok séltakxeykha.

¹⁷ ¡Negwetayók exchakkok! Melwataksek chá'a hélanok ma'a sélenmexma;

¹⁸ apmelassamákpek ma'a sélnaqta, aptawáseykegkek xama aqsok yaqwayam enxoho ey'asagkohok eyaqhémo.

¹⁹ Xép akke Wesse', apteme nak segkésso sekyennaqte, ¡hépetkoho sa'! ¡epekhésha sa' hey'ótak hepásegwata'!

²⁰ Nágyoho ko'o hélyetxak sawo amátog, nágyoho heyaqhek xa semheg nak,

²¹ hewagkas teyp ketók setamakxa xa méwa nak, ¡hemyow ketók sélyetxaqxamakxa xa weyke kelennay'awo nak!

²² Altennaksek sa' ko'o exchep apwesey m'a élyáxeg'a nak, alteméssesek sa' apcheymákpoho neyseksa apchaqneykekxa'.

²³ Kéxegke kéláyo nak Wesse' egegkok, ¡kólpeykesho! ¡Kóltemésses apcheymákpoho kélyókxoho kéxegke kélteme nak Jacob aptawán'ák neptámen! ¡kóltemésses apwányam kélyókxoho kéltáha nak Israel aptawán'ák neptámen!

²⁴ Hakte mewanyók chá'a énxet apkelmopyóseka nak ma'a, megkatnehek chá'a melányo m'a ektémakxa nak apkellegeykegkoho, méxánegkesek han. ¡Yeyxhok chá'a apkeltamho enxoho epasmok!

²⁵ Alpeykeshok sa' ko'o exchep ektémakxa mehegyenyaweykha nápaqta'awók ma'a énxet'ák apagkok apxámokma nak; alának sa' ko'o séltennassama nak xép alána', nápaqta'awók ma'a ektáha nak chá'a exchep apcháyo.

²⁶ Kóltawák kéltéyak kéxegke kélnaqtawáseykegkoho nak, ekwokmoho kélyaqkanakmo; kóltemésses sa' apcheymákpoho Wesse' egegkok kéxegke ektáha nak kélchetamso, keñe sa' exámhok apyeyam kélweynchámeykha.

²⁷ Kaxén sa' kélwáxok kéxegke Wesse' egegkok kélyókxoho pók aptémakxa nak énxet'ák kélheykha keso náxop, kólyo'óta sa' ma'a; ¡kóltekxeyák sa' kéltapnák apmonye' m'a!

²⁸ Hakte Wesse' egegkok apteme Wesse' Apwányam, cha'a apkeláneykha chá'a apyókxoho pók aptémakxa énxet'ák ma'a.

²⁹ Kólháxahák kélyókxoho kélteme nak kelwesse'e, kólpeykesho chá'a wánxa m'a, tén han kélyókxoho peya nak kóltemekxak makham xapop, hakte háwe kélagkok kéxegke kélyennaqte.

³⁰ Elpeykeshok sa' chá'a Wesse' egegkok ma'a étawán'ák netámen nak, elxének sa' chá'a neyseksa apheykha;

³¹ eltennasha sa' chá'a ektémakxa ekpéwomo aptémakxa m'a peya nak elántépekxak makham egmonye', tén han ma'a aqsok apkelane.