Salmos 20 - Biblia Enxet

Nélmaxnagko néltémo ólmallanagkok

¹ Wesse' egegkok sa' xép yátegmowagkok eyesagko enxoho ektáhakxa apha; Jacob Dios apagkok sa' emyók xép.

² Sa' yenyeyk yáphássesek xép yaqwayam epasmok ma'a tegma appagkanamap nak Sión.

³ Kaxének sa' chá'a apwáxok ma'a ekyókxoho aqsok apmésso naqsa nak chá'a, emok sa' takha' yetlo ekleklamo apwáxok ma'a aqsok apkelwatno nak xép.

⁴ Elának sa' ekyókxoho m'a ekmámenyého nak chá'a apwáxok xép, esawhohok sa' elának ekyókxoho m'a ekxeyenma nak apwáxok elána'.

⁵ Keñe sa' negko'o ólátsaha kalpayhekxak egwáxok eñama apmallanma, ólya'aksek sa' néten bandera yetlo nenxeyenma apwesey Dios egagkok. ¡Wesse' egegkok sa' elának ekyókxoho aqsok apkelmaxneyeykha nak!

⁶ Ekya'ásegkók ko'o Wesse' egegkok egkések apmallanma m'a wesse' apwányam ektáha nak apkelyéseykha; ekya'ásegkók yátegmowagkok ma'a aphamakxa nak néten ekpagkanamaxche', ekya'ásegkók egkések ekxámokma apkelmalláneyak yetlo apmopwána.

⁷ Nápakha énxet'ák chá'a yásenneykxak ma'a yátnáxeg apkelyenyawasso apkenchesso nak kempakhakma, nápakha han chá'a elásenneykxak ma'a yátnáxeg apkelchánte; keñe negko'o negásenneykekxo chá'a m'a Dios Wesse' egegkok.

⁸ Kalyelqaxkohok eyke chá'a apyay'ák ma'a, keñe elyaqnenek chá'a, keñe negko'o, mólyaqnenek chá'a, ólchempekxak chá'a néten.

⁹ ¡Wesse', emallahanches xép ma'a wesse' apwányam nak! ¡Hegátegmowák chá'a negko'o negwóneyncha'a enxoho!