Salmos 2 - Biblia Enxet

Xép apteme hatte

¹ ¿Yaqsa ektáha apyennegkesa nak exma énxet'ák melya'áseyak nak Dios? ¿Yaqsa ektáha apkelánegkokxo nak aptamhágkaxa ekteme nak mékoho?

² Apyepetchákxeyk pók kelwesse'e apkelwányam tén han apkelámha apmonye'e nak keso náxop, apkelánegkokxeyk aptamhágkaxa apkenmexa m'a Wesse' egegkok, yetlo m'a wesse' apwányam ektáha axta apkelyéseykha Wesse' egegkok.

³ Aptáhak apkelyennaqtésa apkelpeywa s'e: “¡Ólhaxyawaksek sẽlnaqtete nak ekyennaqte! ¡Ólhaxyawaksek sẽlnaqtete nak táma apagkok!”

⁴ Apkesméssek Wesse' egegkok apteme nak wesse' apwányam ma'a néten;

⁵ keñe apkeltaqnaweygko apkelyegwakkasa, aplókók apagko' aptáha apkeláneya s'e:

⁶ “Élyéseyha ko'o xama wesse' apwányam ahagkok ma'a néten nak egkexe Sión, ekteme nak egkexe ahagkok sekpagkanma.”

⁷ Añeksek sa' ko'o appeywa nak Wesse' egegkok: Aptáhak ko'o seyáneya s'e: “Xép aptáha hatte; sakhem sektáha ko'o exchep apyáp.

⁸ Hélmaxna ko'o ekyókxoho apkelókxa, almések sa', apagkok sa' etnehek ekweykmoho m'a ektemegwánxa nak néxa xapop.

⁹ Elnápok sa' kelwesse'e apkelwányam meyke apmopyósa apkelányo; ¡máxa sógweygke kéllanel'a yelpa' kélteméssesso nak nápakha'a apketkók sa' etnéssesek elnápok!”

¹⁰ Kelwesse'e apkelwányam, tén han apkelámha apmonye'e nak keso náxop, kóltaqmelchesho kélháxenmo s'e, ¡kalestegák se'e, kóláwho han!

^11-12 Kólpeykesho Wesse' egegkok, yetlo élpayheykekxa kélwáxok, tén han yetlo kéláyo, kóltekxeyák kéltapnák apmonye', yetlo kélpexyennama kélaye, elwok katnehek, tén kéxegke kóletsapok ma'a ámay, hakte ñohok chá'a katyapok ma'a aplo nak. ¡Apkeleñémo énxet'ák apkelyexánegweykekxa nak chá'a ektémakxa sentaqmelchesso Wesse' egegkok!