Salmos 19 - Biblia Enxet

Aqsok apkelane Dios senxekmósso apcheymákpoho

¹ Néten senxekmósso negko'o Dios apcheymákpoho, yaphope ekyápaqmate séltennasso m'a aqsok apkelane nak.

² Kaltennasha chá'a mók ma'a ekhem; kaxénekxohok chá'a axta'a kaltennasha m'a mók axta'a.

³ Manlegyek eykhe m'a élpeywa nak, manlegyek eykhe m'a ektáhakxa enxoho,

⁴ kasawhekxohok eyke ekyókxoho nélwanmeygkaxa m'a élpeywa, ekweykmoho m'a néxa xóp nak nélwanmeygkaxa. Cha'a appekkenchessamakxa Dios ekyetnamakxa ekhem ma'a,

⁵ cha'a ekteyapmakxa chá'a katnehek ma'a ektémól'a kaxwe élyamhopma etyapok ma'a apteyenmakxa', ekpayheykekxohol'a apwáxok yenyehekxak makham, aptémól'a m'a apkelteyásamákpohol'a chá'a.

⁶ Katyapok chá'a ekhem xama nekha yaphope, kayeyhekxak chá'a kataxnegwakxak ma'a mók nekha nak, méko han xama enxoho awanchek keyxánegkesek ma'a ekmexanma.

⁷ Péwók han ma'a Wesse' egegkok nak nélxekmowásamáxche apagkok, hakte hegmeyásekxohok chá'a axnagkok negyennaqte. Mogwanchek agya'ássók ma'a apkeltémókxa nak antéhek Wesse' egegkok, hakte kagkéshok chá'a apmopwána aqsok ma'a énxet meyke nak apya'áseyak.

⁸ Kelpéwók ma'a apchánamakxa nak antéhek Wesse' egegkok, hakte hegméshok chá'a ekpayheykekxa egwáxok. Cháxña'awók agko' ma'a apkeltémókxa nak antéhek Wesse' egegkok, hegya'assásegwók chá'a.

⁹ Tásek ma'a negáyo nak Wesse' egegkok, megkamassegwomek han. Ekmámnaqsoho agko' nahan ma'a apchánamakxa nak antéhek Wesse' egegkok, kelpéwók ma'a ekyókxoho nak,

¹⁰ ¡kélmenyeyk agko' han, yeykhágweykmók ma'a ektémakxa nak kélmámenyého sawo ekyátekto ekmomnáwa ektaqmalma! ¡atsók agko' han, yeykhágweykmók ma'a ektémakxa nak ekmátsa yányawhéna' apyegmenek!

¹¹ Ko'o han senókáseykha, sektáha nak xép apkeláneykha, awanchek han hempasmok nélyahákxoho enxoho.

¹² ¿Yaqsa awanchek kay'ásegwakxohok aqsok megqakhémo? ¡Wesse', ná eyaqmagkásekxa aqsok magwaqhémo neyseksa may'áseyak!

¹³ Heyenyókas eyeymáxkoho ewáxok ko'o sektáha nak xép apkeláneykha; nágyoho hemok ma'a ektémakxa nak eyeymáxkoho egwáxok. Keñe sa' ko'o atnehek énxet meyke ekmaso aptémakxa; kamaskok sa' sekteme ekyawe may'assáxma.

¹⁴ Oh Wesse', apteme nak sekyexanmo, tén han sewagkasso teyp, ema sa' yetlo ektaqmeleykha apwáxok sekpeywa tén han élchetámeykha ewáxok.