Salmos 144 - Biblia Enxet

Xama wesse' apwányam apmésso ekxeyenma apwáxok Dios

¹ ¡Apcheymákpoho sa' chá'a kólteméssesek Wesse' egegkok, apteme nak chá'a setaqmelchesso! Cha'a séltámésso ko'o m'a tén han seyewánéssesso yaqwayam wampakhak;

² cha'a apteme sekxegexma meheyenyaweykha m'a, sekyexánegweykekxexa', sénátweykekxexa netnók agko', sewagkasso teyp; cha'a apteme seyáhakkásamáxche', semasma m'a; cha'a sélmésso chá'a ko'o énxet'ák yaqwayam atnehek séláneykha.

³ Wesse', ¿yaqsa m'a énxet ekxeyenma nak chá'a apwáxok xép? ¿Yaqsa m'a nentáha nak énxet ekyetnakhassamo nak chá'a apwáxok?

⁴ Aphawók xama nentekkesól'a nennama m'a énxet; yahamok kamaskok apyennaqte ektémól'a pessesse kamallánek,

⁵ Wesse', emeykásekxa néten, keñe sa' eweywenta'; elpaknegwomho egkexe, yaqwayam sa' kalpaqnek;

⁶ elnextegkes yágke aktek apagkok, tén han apkelyenma, yexpánches emenxenek ma'a apkelenmexma.

⁷ Ey'ásenta apmek neyseksa apha m'a néten, hewagkas teyp neyseksa wátsam ekwányam; nágyoho ko'o hemok ma'a pók énxet'ák nak,

⁸ aptamheykegko nak chá'a apkelmopwancha'a amya'a, megkahaxanma nak chá'a etnahagkok apkelmopwancha'a amya'a elya'aksek néten apmek apkelya'assamakxa etnéssesek naqso' apkelpeywa.

⁹ Wesse', anneykmássesek sa' xép xama negmeneykmasso axnagkok; anneykmaksek sa' negmeneykmasso yetlo sekpáwasso yát'axpog.

^10-11 Xép, apkelmallahanchesso nak chá'a kempakhakma kelwesse'e apkelwányam; tén han apmallahanchesso axta m'a apkeláneykha David, hemallahanches ko'o neyseksa m'a sókwenaqte segaqhamo nak; nágyoho ko'o hemok ma'a pók énxet'ák nak, aptamheykegko nak chá'a apkelmopwancha'a amya'a, megkahaxanma nak chá'a etnahagkok apkelmopwancha'a amya'a elya'aksek néten apmek apkelya'assamakxa etnéssesek naqso' apkelpeywa.

¹² Apkektegamchek egketchek ektémól'a aqsok kélcheneykekxa m'a kélcheneykekxexa nak pánaqte exnók; hawók egketchek kelwán'ák ma'a élámha élméyak nak chá'a m'a tegma apyawe aptaqmalma.

¹³ Kelláneykegkok aqsok aktek negkeneykekxa m'a nenxátamakxa nak chá'a, kelláneykegkok mók ektémakxa nento. Xámeykekxók agko' ma'a aqsok nennaqtósso, xámok han ma'a yókxexma egagkok.

¹⁴ Tásek ektamhéyak lós'awók weyke nennaqtósso méko xama enxoho étkok étsapma awáxok. Méko élpayheykha enxoho kélatña'ák ektemégweykmoho exma m'a ámay egagkok nak.

¹⁵ ¡Apkeleñémo énxet'ák ekteme nak apheykha xa ektáha nak! ¡Apkeleñémo énxet'ák apteme nak Dios apagkok ma'a Wesse' egegkok!