Salmos 143 - Biblia Enxet

May'ásseykmok ko'o exchep

¹ Wesse', yeyxho sélmaxnagko; etaqmelchesho apháxenmo sekwóneykha. ¡Heyátegmowák, hakte xép apteme appéwomo, tén han mehenyenyaweykha!

² Ná hékpelkoho aqsa ko'o hélyetsetchásekxak sektémakxa, ko'o sektáha nak apkeláneykha, hakte méko nápaqtók xép ma'a meyke nak ektémakxa.

³ Élyetleykha apmáheyo heyaqhek ma'a sélenmexma, épetchessegkek xapop; apkeltémok axnamok ma'a ekyáqtéssamakxa nak exma, ekhémók ko'o m'a apkeletsapma axta nano'.

⁴ Yelqáxcheyk agko' ewáxok; tawáseyha ewáxok may'áseyak sektáhakxa.

⁵ Xénwákxok ko'o ewáxok ma'a nanók axta, xénchek ewáxok ekyókxoho m'a aqsok apkelane axta.

⁶ Élya'ássessek ko'o emék ekpayhókxa aphakxa exchep, émenyeyk ahagko', máxa m'a xapop ekyamayél'a kámenyéhok yegmen.

⁷ Wesse', ¡heyátegmowák heykxa', hakte yelqáxcheyk ko'o ewáxok! Ná etne mehelányo, axhok katnehek ma'a apkeletsapma nak.

⁸ Hey'assásegwakxoho chá'a ko'o ektémakxa seyásekhayo ekyókxoho axto'o, hakte may'ásseykmok ko'o exchep. Hey'ássesagkoho chá'a yaqwánxa atnehek sekweynchámeykha, hakte éltennássek ko'o exchep ma'a aqsok sekmámenyého.

⁹ Wesse', hewagkas ko'o teyp, neyseksa apmáheyo hemok sélenmexma, hakte ekye'eykekteyk ko'o exchep sektegyeykencha'a sekyexanmomakxa'.

¹⁰ Hélxekmós ko'o yaqwayam alának ma'a apmopmenyého nak, hakte xép apteme Dios ahagkok. ¡Héntemekxak sa' ámay ekpéwomo m'a espíritu aptaqmalma apagkok nak!

¹¹ Wesse', ¡yána aweynchamha chá'a! ekhawo apxeyenmakxa axta hetnéssesek, ¡hemallahanches ko'o ekmaso sekha! hakte appéwomo exchep.

¹² Emasséssem sélenmexma, hakte xép apteme meheyenyaweykha, ¡emasséssem apyókxoho sélenmexma, hakte ko'o sekteme exchep apkeláneykha!