Salmos 141 - Biblia Enxet

Énmexmók ko'o aphakxa exchep

¹ Wesse', ekwóneyha ko'o exchep, ¡epekhaksoho exegma'! ¡yeyxho chá'a sekpeywa sekwóneyncha'a enxoho!

² Yána kaxhok ko'o sélmaxnagko aphakxa m'a aqsok ekmátsa nak ekpaqneyam éten agkok, yána kaxhok aqsok kélmésso naqsa nak chá'a taxnám ma'a sélya'asso nak chá'a néten emék,

³ Wesse', hepekkenches ko'o xama apmasma nak chá'a apaqmétek ekmaso; hélánesagkoho chá'a sekpeywa peya enxoho chá'a apaqmétek.

⁴ Nágyoho ko'o kaxének ewáxok alának aqsok ekmaso; nágyoho alyetlawha m'a apkeláneykegkoho nak chá'a apkeltémakxa ekmaso, essenhan apasmok apkeláneyak ektámáxche ekyawe m'a élmasagcha'a nak apkeltémakxa.

⁵ Hepasmok chá'a ko'o señassásegkoho enxoho m'a énxet meyke nak aptémakxa, máxa sokmátsa ekmátsal'a ekpaqneyam chá'a katnehek ma'a sepaqhetchesa enxoho ekyennaqte. Mataqnókkehek chá'a ko'o xa sepékessáseyak nak; alenxanmagkohok sa' aqsa sélmaxnagko, neyseksa setekpageykha.

⁶ Kólchexeynták sa' néten meteymog ma'a apkelámha amonye'e apagkok nak ma'a élmasagcha'a apkeltémakxa, elya'ásegwók sa' ektáha naqso' ma'a sektáhakxa sekpeywa.

⁷ Kólexpánchesha sa' apexchakkok ma'a ekpayho nak takhaxpop, ektémól'a kólpeynchok xapop namyep.

⁸ Wesse', énmexmók ko'o aphakxa exchep. Ekye'eykekteyk ko'o exchep séltémo hemyók: ná heyenyow aqsa.

⁹ Nágyoho hemok kelhanma sélpekkenchessama nak emonye'; cham'a apkelhanma nak énxet'ák élmasagcha'a apkeltémakxa.

¹⁰ Kalmekxohok sa' agkok apkelhanma m'a élmasagcha'a nak apkeltémakxa, keñe sa' ko'o axog aqsa meyke setnahakxa.