Salmos 139 - Biblia Enxet

Dios apya'áseykegkoho ekyókxoho aqsok

¹ Wesse', apkelányok xép sektémakxa, ey'ásegkok nahan;

² apya'ásegkok xép ekyókxoho aqsok sélane; makhawók eykhe aphakxa, ey'asagkohok eyke chá'a ektémakxa élchetamso ewáxok.

³ Apya'ásegkok ekyókxoho ektémakxa sekweynchámeykha, sekxega tén han sekheykekxa, ¡apya'ásegkok ekyókxoho aqsok sélane nak chá'a!

⁴ Wesse', megkatyepek eykhe chá'a ko'o sekpeywa, nanók eyke ey'asagkohok chá'a exchep yaqwánxa atnehek.

⁵ Ehaxtegkessegkek xép sekhakxa; emasmeyk nahan yetlo apmopwána.

⁶ Megkalxegkáseykha ko'o ay'asagkohok ektémakxa nak ekyawe apya'áseykegkoho; ¡mowanchek ay'asagkoho', awanhók agko'!

⁷ ¿Háxko ewanchek ko'o amhagkok eyxánegkesek espíritu apagkok? ¿Háxko amhagkok eyxánegkesek xép?

⁸ Eyánteyk agkok ko'o m'a netnók agko' nak néten, apheyk xép ma'a; ektaxneyk agkok han ma'a apkelmaheykegkaxa nak apkeletsapma, apheyk nahan xép ma'a;

⁹ émpa'ak agkok han amhagkok ma'a ekteyapmakxa ekhem, essenhan axnamok ma'a néxa nak wátsam ekwányam taxnegwánxa ekhem,

¹⁰ héntamha han ma'a; ¡meyenyekxék apméyak émek apkelya'assamakxa!

¹¹ Xénchek agkok ewáxok eyxánmok ekyáqtésakxa exma, essenhan ektamhákxo enxoho axta'a m'a élseyéxma sewakhaya nak ko'o,

¹² meheyápek ko'o ekyáqtésso exma hélanok xép, kalsáwhok sa' aqsa exma axta'a ektémól'a ekhem. ¡Méko exchep ekyeykhamaxche mók apkelányo m'a axta'a tén han ekhem!

¹³ Xép axta apkelane ekyókxoho sekyókxa; xép axta sélane sekyetnamakxa kañe' méme awáxok.

¹⁴ Alpeykeshok sa' ko'o exchep, hakte kelchetagkassegkek axta ewáxok setnéssessamakxa, hakte tásók agko' ma'a aqsok apkelane. ¡Ekya'ásegkók nahan ko'o!

¹⁵ Apweteyak axta exchep ektémakxa éktegama exchakkok sekyókxa, sélánamáxko axta m'a móteyamaxchexa nak, sélánamáxko axta m'a kañók agko' nak xapop.

¹⁶ Apweteyak axta exchep sekyókxa matyeykemxa axta makham; heykegkek eknaqtáxésamaxche ekyókxoho weykcha'áhak apagkok xa. Táxésamaxcheyk axta han yaqweykenxa katnehek sekweynchámeykha, may'áseykegkaxa axta ko'o makham xama enxoho xa ekhem nak.

¹⁷ Oh Dios, askehek agko' ko'o ay'asagkohok ma'a élchetamso nak apwáxok; ¡xámok agko' ma'a ekyókxoho nak!

¹⁸ Peyk agkok ko'o alyetsetek, kayeykhágwomhok ma'a ekweykenxal'a yagkamex; ekxatakha'a agkok chá'a, cháxa katnehek apha xa.

¹⁹ Oh Dios, elnáhap élmasagcha'a nak apkeltémakxa, hélya'ásses makhawók ma'a ekyetno nak chá'a apkelyógkexma',

²⁰ cham'a apxéneykha nak chá'a ekmaso exchep, eyaqhémo nak chá'a yenmexek xép.

²¹ Wesse', altaqnawhok ahagko' ko'o m'a aptaqnagko nak chá'a exchep, altaqnawhok ko'o m'a apkenmexeykha nak chá'a exchep.

²² ¡Altaqnawhok ahagko' ko'o m'a! ¡Sélenmexma ko'o m'a!

²³ Oh Dios, elano sektémakxa ékpelkoho ewáxok; hépkeyn, ey'asagkoho élchetamso ewáxok;

²⁴ hélano, yetneyk kexa may'assáxma, hey'ásekxa m'a ámay megkatnégwayam néxa nak.