Salmos 138 - Biblia Enxet

Nélmaxnagko negmésso ekxeyenma egwáxok Wesse' egegkok

¹ Wesse', agkések sa' ko'o exchep ekxeyenma ewáxok ekweykmoho kañók agko'; anneykmássesek sa' negmeneykmasso naqta'awók ma'a aqsok kéláyókxa ekha nak élmowancha'a.

² Altekxók sa' ko'o etapnák apayhohok ma'a tegma appagkanamap apagkok aptaqmalma nak, yaqwayam agkések ekxeyenma ewáxok eñama segásekhayo, tén han apteme apmámnaqsoho, hakte apteméssessegkek xép apwesey tén han appeywa néten agko' ma'a ekyókxoho aqsok.

³ Ekwóneyha axta, eyátegmowágkek axta, egkeyásekxeyk axta makham mók sekyennaqte.

⁴ Apyókxoho apkelwesse'e apkelwányam sa' elpeykeshok xép apheykha nak keso náxop, apkelleg'a enxoho aqsok apmáheyo elának xép.

⁵ Elpeykeshok sa' Wesse' egegkok eñama m'a aqsok apkelane nak, hakte awanhek agko' ma'a apcheymákpoho nak Wesse' egegkok.

⁶ Netnók eykhe aphakxa m'a Wesse' egegkok, étak eyke chá'a m'a énxet megkeymáxkoho nak apwáxok, makhawók chá'a ékpelkohok ma'a apcheymákpoho nak.

⁷ Ekwet'ak agkok chá'a ko'o ekmaso sekha, megyohok chá'a watsapok; apmopwána chá'a emha, keñe hewagkasek chá'a teyp setaqnawaya enxoho m'a sélenmexma.

⁸ ¡Elának sa' Wesse' egegkok ekxeyenmakxa axta apwáxok hetnéssesek! Wesse', megkamassegwomek xép segásekhayo; ¡ná eyensem aqsa mepenchesso m'a aqsok apkelane axta!