Salmos 136 - Biblia Enxet

Dios megkamassegwayam segásekhayo

¹ Kólmés ekxeyenma kélwáxok Wesse' egegkok, hakte tásek apwáxok ma'a, megkamassegwomek chá'a segásekhayo.

² Kólmés ekxeyenma kélwáxok Dios, apteme nak Dios neyseksa ekyókxoho aqsok kéláyókxa, hakte megkamassegwomek chá'a segásekhayo.

³ Kólmés ekxeyenma kélwáxok Wesse' egegkok, apteme nak Wesse' nepyeseksa apyókxoho kelwesse'e, hakte megkamassegwomek chá'a segásekhayo.

⁴ Apteme nak chá'a wánxa apkelane élyawe aqsok sempelakkasso nak agweta', hakte megkamassegwomek chá'a segásekhayo.

⁵ Apkelane nak néten, yetlo apya'áseykegkoho, hakte megkamassegwomek chá'a segásekhayo.

⁶ Appekkenma axta xapop néten yegmen, hakte megkamassegwomek chá'a segásekhayo.

⁷ Apkelane axta ekhem tén han pelten, hakte megkamassegwomek chá'a segásekhayo,

⁸ ekhem yaqwayam chá'a kalsaksek exma, hakte megkamassegwomek chá'a segásekhayo;

⁹ pelten tén han yaw'a, yaqwayam elsaksek chá'a exma axta'a, hakte megkamassegwomek chá'a segásekhayo.

¹⁰ Apkelnapma axta kélketchek apmonye' appalleyam apyókxoho étchek ma'a kelán'ák Egipto, hakte megkamassegwomek chá'a segásekhayo.

¹¹ Apkelántekkessama axta Egipto m'a israelitas, hakte megkamassegwomek chá'a segásekhayo;

¹² apmeykencha'a axta ekyawe agko' apmopwána, hakte megkamassegwomek chá'a segásekhayo.

¹³ Apmeykáseykekxo axta neyseksa m'a Wátsam Ekwányam Ekyexwase, hakte megkamassegwomek chá'a segásekhayo.

¹⁴ Apkelyeykháseykekxo axta Israel ma'a neyseksa wátsam ekwányam, hakte megkamassegwomek chá'a segásekhayo.

¹⁵ Apweykáseykegko axta Wátsam Ekwányam Ekyexwase m'a faraón, yetlo sẽlpextétamo apagkok, hakte megkamassegwomek chá'a segásekhayo.

¹⁶ Apkelya'assama axta énxet'ák apagkok apkelpékessamo m'a meykexa nak énxet, hakte megkamassegwomek chá'a segásekhayo.

¹⁷ Apkelnapma axta m'a kelwesse'e apkelwányam apkelyennaqte, hakte megkamassegwomek chá'a segásekhayo.

¹⁸ Apkelnapma axta m'a kelwesse'e apkelwányam apkelwesey nátegma, hakte megkamassegwomek chá'a segásekhayo,

¹⁹ cham'a Sihón, wesse' apwányam apagkok axta amorreo, hakte megkamassegwomek chá'a segásekhayo;

²⁰ tén han Og, wesse' apwányam axta m'a Basán, hakte megkamassegwomek chá'a segásekhayo.

²¹ Apmelásektama axta xapop ma'a énxet'ák apagkok, apagkok axta m'a kelwesse'e apkelwányam nak, hakte megkamassegwomek chá'a segásekhayo,

²² apméssama axta yaqwayam etnehek apagkok ma'a apkeláneykha Israel, hakte megkamassegwomek chá'a segásekhayo.

²³ Ekxénweykmo axta apwáxok negko'o negmenxenamaxko axta, hakte megkamassegwomek chá'a segásekhayo.

²⁴ Sẽlwagkassama axta teyp nepyeseksa nélenmexma, hakte megkamassegwomek chá'a segásekhayo.

²⁵ Apkeleykegkoho nak chá'a aptéyak énxet'ák, tén han aqsok kélnaqtósso, hakte megkamassegwomek chá'a segásekhayo.

²⁶ ¡Kólmés ekxeyenma kélwáxok Dios apha nak néten, hakte megkamassegwomek chá'a segásekhayo!