Salmos 134 - Biblia Enxet

Wesse' egegkok sa' epasmok

¹ ¡Kólchexyem Wesse' egegkok apkeláneykha nak! ¡Kólpeykesho Wesse' egegkok kélyókxoho kéxegke kéltamheykha nak chá'a tegma appagkanamap apagkok axta'a!

² ¡Kólye'és néten kélmék neyseksa kélchaqneykha m'a tegma appagkanamap, kólpeykesho Wesse' egegkok!

³ ¡Epasmok sa' Wesse' egegkok apkelane nak néten, tén han keso náxop, cham'a aphamakxa nak egkexe Sión!