Salmos 133 - Biblia Enxet

Ektaqmelakxoho agko' antéhek nélásekhamaxkoho

¹ ¡Ektaqmelakxoho agko' nak la'a agwetak elásekhakpohok ẽlyáxeg'a, tásók agko' katnehek xa ektáha nak!

² Kaxhok ma'a sokmátsa élpexyaweykentámhol'a apqátek ma'a apkelmaxnéssesso Dios énxet'ák apagkok, ekweyktámho áwa' apátog, tén han ma'a aptaxno apyespok nak.

³ Kaxhok ma'a yálye ektéyeykmohol'a egkexe Hermón, tén han ektéyeykmohol'a néten nak egkexe Sión. Cha'a apcháphassamakxa Wesse' egegkok ekwenaqte negweynchámeykha m'a.