Salmos 130 - Biblia Enxet

Magya'ásseyam Wesse' egegkok

¹ Wesse', ekwóneyha exchep neyseksa ekmaso agko' setnahakxa:

² Wesse', ¡yeyxho sekpeywa!, ¡eñoho sekwóneykha séltémo hepasmok!

³ Wesse', apkelyetsátegkek agkok xép nentémakxa mólya'assáxma, ¡méko awanchek kagketaxche'!

⁴ Meyaqmagkásekxeyk eyke exchep nentémakxa, yaqwayam enxoho agáwhok chá'a.

⁵ Élhaxanmeyk ko'o hepasmok Wesse' egegkok ekweykmoho kañók agko' ewáxok, may'ásseykmok han ma'a appeywa.

⁶ Awanhók agko' ko'o sélhaxanma Wesse' egegkok, megkaxnawok ma'a ekweykenxal'a chá'a apkelhaxanma kalsék ma'a apkelhaxneykha. Cham'a ektémakxa nak apkelhaxanma kalsék ma'a apkelhaxneykha nak,

⁷ etne exchepxa xa Israel, eleyxek ma'a Wesse' egegkok, hakte yetnegkek segásekhayo m'a, tén han ekxámokma apmopwána hegmallahanchesek.

⁸ ¡Sa' emallahanchesek Israel ekyókxoho melya'assáxma m'a!